大滿足的日式蒸海鮮餐：虎嘯

十月初，朋友帶我去食日式蒸海鮮。莫講日式，港式果隻我都好似無食過，原因？對於海鮮，我喜好係：一係刺身，一係炸。蒸呢方面並非最愛。餐廳係位於天后名叫「虎嘯」，都係果隻一幢樓每層唔係好大既新式商業大廈。

當晚每人都食呢個「罕有法國藍龍蝦海鮮蒸氣刺身套餐，位位HK$588，食乜寫好晒，我當晚係非非非常滿足，而且仲有食唔晒外帶。

俾你地睇下有乜食再慢慢介紹，不如望望刺身先：

刺身唔特別impressed但水準不俗，酒漬海蝦與龍蝦刺身出色。

好喇，入正題！首先有一樣野非常好係，佢地會有專人幫你蒸：蒸幾耐，要點食，配上乜調味料，侍應都會細心講解。眼前呢個法國藍龍蝦，佢地已經預先稍稍調味，所以時間一到，放係前面，先試原味已經好得好得！

蘇格蘭帶子配海草用西京麵豉醬調味，你知啦帶子一蒸過籠就唔好食，呢個唔會，而且調味配合，整個湯都俾我KO埋！

韓國鮑魚與西班牙青口，喂無得輸架果隻鮮甜，就算一邊食一邊擔心會唔會痛風架喂（咁就無既我之後飛埋高雄都無事）。

圖左應該係對本人最Challenging，我比較怕食蒸魚，結果呢個一夜干石特魚與及山椒豉油漬白鱔，食晒！然後係牛肉福袋與墨魚滑，都好唔錯。

仲有仲有，咁鬼大隻既海蝦，與及同京蔥醬油調味阿波尾雞，鮮甜多汁！

始終唔能夠齋食肉，所以有呢個櫻花蝦芝士烏冬，與及蒸野菜。

介紹返，當晚另點呢支酒，好得，配海鮮一流。

所有蒸物精華流落鍋再煮成雜炊，嘩鮮甜到不得了，食唔晒？打包走囉！

甜品水準都唔錯架！

總結：其實晚市呢個價錢（唔計支酒）食到呢個水準真係好好，特別係唔晒擔心自己唔知蒸幾耐整得唔好食，呢個價錢又唔會食到高質自助餐，所以都係一個幾唔錯既選擇呀！