Sydney開飯：越南牛河報告

去悉尼，除左Fish Market一定要去（唔止一次）之外，我好多時都會食越南河。上次去過Flemington食完再食水準實在不得了，今次逗留一星期，我食左四次越南牛河，其中一餐仲係機場臨走搭早機前食。

以為整體上一定好食咩？錯！有一間實在我一邊食一邊表示：呢間都幾唔掂。唔掂，係我食得出只靠蔗糖與味精既湯底，咁無理由唔介紹一番既，下話。

絕不推介：新越餐室Viet Noodle House
我唔明點解細佬第一晚帶我黎呢間，佢後來當然話：唔係你點會覺得之後帶你去食既好食咁多丫！嗯。此店位於Eastwood，網上表示最出名係脆皮烤雞，問題係我被帶去食越南河，而細佬點既咖喱亦並不好食：

賣相無乜野架，不過湯底好好好差：完全感受到蔗糖味精仲要唔知淡定唔夠味加上大量胡椒粒，牛柏葉牛筋淡而無味，好無癮。

皮如此厚實既越式春卷實在令人驚嘆，無補記，next！

咖喱牛腩跟法包，咖喱汁係好好好好辣而唔香，即係煮得好失敗囉。

算係咁：Rolld Vietnamese
臨過關前搵野食，結果又走去食越南河。咁絕對明白機場出現既水準都係咁上下，結果當然唔算好出色，不過湯底肯定有誠意過樓上呢間，以機場快餐食物水準黎講，收貨囉。

商業區平靚正之選：Viet's Pho
其實餐廳名真係好似，來來去去都係咁。工作地點身處North Sydney，細佬咁岩又係，於是某個午餐佢帶左我去Miller Street既呢間小店。無乜裝修，不過食物就令我好喜歡喇！

湯底望落平平無奇，一飲就知道花左心機而且清甜，牛肉係非常欣賞既部份，真係半生熟而且嫩滑，我真係成碗連湯都隊晒。

至於呢個烤豬扒飯，個人意見，應該係洋人先覺得好食，烤到咁既款，雖然食落可以而且好多。

驚為天人：Phd Vietnamese Restaurant
細佬明查暗訪帶我去Marrickville Road既呢間舖頭，你個名改到咁勁，對你期望實在好大架播。

現場情況係咁：我飲第一啖湯，嘩左一聲，再飲，然後叫細佬自己試。佢試完，話從未飲過越南河湯底係咁好味，當中有加藥材，但整個湯味道組合非常特別出眾。細佬表示一定要帶弟婦黎食，因為，實在好食又抵食，雖然喳車過黎有少少遠咁囉，仲要呢碗呢，係普通Size，若果貪心叫加大，肯定唔知典算。

同場加映：明海餐廳
身在美國既師兄突然介紹呢間一定要去，話佢既鹽焗雞飯無得輸，細佬一聽就話呢間係佢讀書時期同弟婦既飯堂，平靚正又近China Town。佢話牛河都好食，但佢都同意，鹽焗雞跟茄汁炒飯底，一定要食。

先講雞肉：喂你成隻雞脾拆晒肉仲多成咁真係無野講架播，仲要入味又嫩滑，難怪有台灣遊客食過話番到台灣完全唔想再食。呢個茄汁炒飯底又的確好配合，仲要煎左隻咁靚仔既荷包蛋播！仲仲仲仲仲有：旁邊果碗送既雜菜清雞湯係未上飯之前送上，我一飲，嘩，清甜到不得了，點會例水好飲成咁架！

寫完呢篇應該仲有兩三篇，Stay tuned！