2016年9月11日星期日

Sydney開飯:The Bulgogi

今年完全係瞬間吃地球,最近去過Sydney,工作之餘亦有探探親朋。Sydney嘛,餐廳不會太便宜,但大部份都好食兼足料大份。放心放心,唔係好多餐介紹,咁囉。

先寫既係韓燒,即咁,澳洲好多韓燒店,真正由韓國人主理,而由於當地食材靚,所以真係大多數都好食。今次去既呢間叫The Bulgogi,位於Chatswood分店。



舖面唔大,不過裝修真係有花心機,而且通風做得好好,一定唔會成身油煙味。因為我地有小朋友食,選左一個唔駛自己烤既餐,但又唔係烤定俾你架播。
韓式生牛肉:澳洲靚牛加雪梨青瓜絲與及雞蛋,撈好一試,調味好好,材料新鮮,唯一要改善可能係可以切幼少少就好喇,但真係好正囉。
圖上係韓式粉絲,圖下就叫Bulgogi Salad,清新油醋汁新鮮靶菜配上烤牛肉。
呢個佢叫Small Hotpot,可以選麵豉湯泡菜湯辣牛肉湯或者辣豆腐湯。選左麵豉,跟住細佬已經不斷話個湯好得,我一試,麵豉偏甜但好香,湯好多料,除左眼見既蔬菜入面仲有蜆,呢個湯,可以隊兩碗飯!

重點黎喇:個名叫Jache & Seoul Bulgogi,究竟係乜?

首先倒入上湯,然後放上韓式粉絲。
然後阿Oppa好有心機慢慢將蔬菜砌上去,係砌得好有心機果隻。

然後,佢好好心機放牛肉上去,幫你烤好!之後我地就慢慢嘆喇!我同好多香港人一樣,去到澳洲食到佢地既菇類,第一個反應係:好香菇味呀!而當地人通常反應係:不嬲都有菇味架啦!牛肉,無得頂,呢個玩法唔駛自己燒又唔會好多油煙,的確好,有小朋友食就更加安全喇。

以上咁多樣食物,呢個餐AUD99.5,加埋一啦當你,都唔駛七百蚊港紙,無論份量與質素都係贏晒。
最後要介紹呢個前菜,當然任食,當中既醃八爪魚實在好好食,極愛。

嗯,年底前有機會去南韓出差,等我比較一下當地水平又如何先。

沒有留言:

發佈留言