絕不推介Palco Ristorante

這只是我大約兩個小時前吃罷的午餐，這一頓是一頓半商務午餐，我請客，對方提議的餐廳。由於跟客人很熟，所以這是一頓半公半私的飯局。

她選這間Palco Ristorante位於灣仔盧押道，裝修華麗，意大利餐館。午餐價錢三道菜加咖啡超過二百元，而結論是，我跟客人都相同地決定，不會再光顧。

不如先看看可以主持乜乜飯局的裝修：

又不如睇睇餐牌：

我都唔介意俾你陰我叫左支HK$68既意大利礦泉水，重點乃食物唔得服務唔專業。先望望麵包：

端此上來的侍應有點鬼食泥地介紹試試我們特製的海鹽牛油。首先，麵包不熱，普通貨色，但最有趣是，海鹽牛油是甜的！連朋友也向我問：真係海鹽牛油？佢咁講，我咁話你聽囉。

餐牌首先吸睛乃花甲－－我實在第一次見西餐廳寫花甲而不是大蜆，可能我孤陋寡聞，而朋友亦有相同感覺。Anyway，我就點了這個海鮮汁煮花甲作頭盤：

花甲實在細隻，煮得還好，不算鮮甜；海鮮汁很普通的質素，絕不驚艷，普通的程度是比起很多西餐廳的周打海鮮湯好少少。配上那塊蒜蓉包，問心，整個擺盤，值呢個價錢咩？

不如又講講服務態度：當朋友仍在考慮吃什麼時，侍應不是走開而是站在你背後俾壓力你；頭盤都未確定吃畢就急不及待上主菜，我那邊是一手拿著主菜另一手收我頭盤的碟，咁囉，若果普通港式西餐廳我明囉，你唔係呢個檔次丫嘛（價錢上）。

太平洋紅蝦扁意粉：侍應並無主動問我們要不要加黑胡椒，而我是吃了些，要求鹽及黑椒，那位女侍應是「下？」之後才明白再拿給我，而那一樽鹽，應該是吉的，所以，我無樽鹽。

這個意粉，極之油膩！油膩程度是好似西式茶餐廳的炒意粉一樣！兩隻太平洋定大西洋蝦，略鮮甜但蝦肉不出色，完全不彈牙，意粉內又有點小龍蝦肉及菇片，整件事，似中廚學人整西餐，好失望。

唯一好食：果粒車厘茄肯定係靚野，好鮮甜咁囉。

朋友吃的是法式鴨腿（意大利餐廳賣法國菜），佢表示，還可以的。

以此甜品當第三個Course實在要不得：港式西餐廳送甜品都係咁上下質素同大細之嘛，更何況，此甜品之質素，我跟朋友最後的結論是：成餐飯都咁麻麻實在唔駛再來。

落樓連加一每人HK$240，雖說公司請客，雖說朋友選擇，但我在此鄭重聲明，我絕不推介這餐廳。