十大中文金曲之謎

我寫這一篇之前我先讀了去年我寫十大中文金曲的，因為我想了解會不會原來他們死不悔改，而又要不要將寫過的再寫一次；另外，我也有看看官方網頁，希望了解一下當中的獎項定義。

你們看到這篇文，原因當然是我真的不明白有些事情，想寫出來讓大家幫一幫忙，看看能否解開某些謎團。你知啦，有份交稅，間接有份俾錢辦呢個頒獎禮架嘛。


首先我要讚的，肯定是暖場司儀曾志豪，羅啟新，黃冠斌。若果你是經過港台電視收看的話，廣告時段他們都會出來，說一些Gag。他們說的大都很好笑，而且非常貼近社會現況：粉筆少女被捕，慈母警察，亞視欠薪，免費電視台的定義，掛極都有的我要真普選，還有黃藍雨傘等等。好笑，好抵死，完全拋開官台的包袱－－所以節目完結，我看見他們其中兩個跟那位廣播署署長交談，都是笑笑口的，希望，沒事。至於司儀方面，我只覺得李志剛出色，其他，不要也罷。

今年的主題是「音樂正選」，官網寫的是表揚音樂人，推動本地流行文化，鼓勵業界繼續創作更多動人的音樂云云。好了，節目三小時，當中有廣告時間，作為一個有歷史的頒獎禮，去年向幾位去世歌手致敬，今年的「致敬時間」更誇張：開首紀念黃霑，十優歌手唱半首再加林子祥唱兩首；中段金針獎向盧國沾老師致敬，四位歌手唱四首；壓軸竟然是今年新增的「名人堂」，得主譚詠麟又唱好幾首歌。請注意，以上所有都唱舊歌，是十幾廿年前的歌，所佔節目時間至少四十分鐘以上，剩餘的還要頒Ｎ個獎，所以，都不知從哪年開始，推動樂壇的港台連十大金曲都唱半首，趕到裙拉褲甩，對得獎歌曲以至歌手極之咁尊重。推動樂壇？不如以後極速宣佈得獎名單然後直入名曲滿天星，唱番十幾廿年前既金曲，橫掂年年都見班坐第一行既高官嘉賓聽到舊歌企起身投入／扮投入地拍手架啦。

有關金曲的結果，根據官網，除樂迷投票民意調查之外，還有二百多位評審：來自作曲及作詞家協會，國際唱片業協會，香港音像聯盟，香港唱片商會，本地傳媒及幾間唱片行；來自六十個境外電台：不過四十一個係國內既。代表性呢家野見人見智，不過，以上投票民調評審團與境外電台四方面的比重如何，我們不知道，但按道理，如此的多方參與，竟然仲可以有同分第十一首歌曲頒發，我真係好想向申訴專員反映，要求公開分數了解一下呢類世紀千載難逢的巧合。

優秀國語歌曲獎的定義又如何呢？去年竟然由宇宙巨GEM翻唱的你把我灌醉獲得金獎已經笑大人個口，今年情況更勁：金獎銀獎均為翻唱作品，若果宇宙巨GEM的銅獎由喜歡你獲得（可惜呢首係廣東歌）就成功來個大滿貫。好了，究竟呢個獎係頒俾本地歌手過去一年國語歌至優秀果三隻丫，定係典呢？即唔係話否定翻唱作品，但若果以呢三首話俾人聽：「喂佢地就係香港歌手2014年至優秀既國語歌喇。」我會覺得，外人聽到，會話你香港國語歌水準乜原來咁架？

咁，陳奕迅先生獲得全國最佳中文歌曲果首陰天快樂，係咪歸納為全國所以就唔係優秀國語歌曲呀？定係好似派膠果個台，有勁爆新人獎之餘俾多個勁爆新人王咁既意思呀？

話說，一向港台「最有前途新人獎」固名思義，乃在乎新人是否有前途，而非新人是否受歡迎。或者我脫節啦，有冇專業人士話我知，天堂鳥能夠獲得最有前途新人銀獎，有前途既地方係邊一處咁呢？

原來，全國最佳獎項前身為全國最受歡迎，由2000年改名為全國最佳。又原來，過去十四年啦，來自新加坡既孫燕姿已經前前後後囉過呢個獎（包括曾經有金銀銅）六次之多。敢問各位，呢個全國呢，係乜野國呀？邊個國家有中國香港台灣新加坡架呢？聯合國？真係同派膠電台既全球全宇宙銀河系勁爆有得揮播！

最後一個，我諗極都諗唔通既謎團：全年最高銷量歌手獎。問問題之前，呢個獎用乜野數據去計架呢？照道理，銷量呢樣野，有數得計應該比較無爭議性，奈何今年賽果實在有趣：張敬軒有出碟，可能真係連同舊碟好賣到成為全年最高銷量，我唔知；不過容小姐全年無出碟都可以成為全年最高銷量女歌手，我又不禁問：乜其他女歌手賣得咁差，差到容小姐舊碟都打唔贏？定係因為某部份唱片公司唔係IFPI所以銷量無報呢？若果如此，麻煩港台不如取消佢啦，呢件事實在好影響香港樂壇－－因為其他歌手賣碟賣得咁差，真係個市好死架嘛。

至於最優秀流行歌手獎，嗯，肯定容祖兒超班，放慢腳步碟都無出派兩首新歌（唔計果堆合唱歌啦下）都已經贏晒台下一眾女歌手，十幾年霸，巴閉巴閉。

事到如今，作為一個官台，我越來越明白，十大中文金曲是絕對不能有真普選的－－因為政府都無，官台點可以有，於是，結果都跟政府作風一樣：利益集團一定要有份，民意結果有少少，餅仔照分，保守行事。既然如此，各建制派睇港台好唔順眼既，唔好再插十大中文金曲，因為佢地已經努力跟住特區政府步伐行事。