「依家個仔K1，佢上晝要佢番一間，下晝就番蘇淅，佢話蘇淅同佢地屋企好近喎。」「咁點得架，小朋友要訓晏覺架嘛。」「係囉，所以個仔下晝一番到黎就話要訓囉。」「好彩K1無乜功課做嗟。」「都係丫！細細個咁辛苦，無得訓晏覺。」「話就話住得近嗟，食晏都趕頭趕命，傻架咩。」由於該升降機速度極快，我沒有機會繼續聽下去。
現時的父母望子成龍真的望到痴晒線，兩歲半三歲人仔要佢番上下半晝兩間學校都可算離晒大譜，好彩剛才兩位女士並不撐呢位母親的抉擇。
如果我係呢個小朋友，感覺會點呢？
我唔記得上下畫邊個Miss教我，同時唔認得班同學：先生要我地互相認識，我硬係唔記得，但我又唔識同先生講，我要記兩班人，好慘架。
若果學校有課外活動，我肯定無得參加，因為我仲要趕下一場。
如果我要穿校服的話，我都唔知點解我要上畫換一套下畫換一套。
越黎越覺得辛苦，點解番學咁辛苦，我好眼訓，食飯都無興趣。
就係因為細細個覺得番學好辛苦，又唔係媽咪接我放學而係賓賓，我越黎越唔鍾意番學，唔鍾意讀書。
阿媽安排我學五六樣野，仲要我讀書，我好唔開心。佢仲成日係我面前話邊個同學仔好叻好叻考到邊間學校，我都唔知有乜野叻。
某一日，當小學派位成績公佈，我入唔到佢最想我入果間名校，佢當街當巷喊，然後鬧我無鬼用。我都唔知點解佢要鬧我，我好唔開心，無人明白我，我鬆開佢手走左去，衝出馬路，結果，俾車撞死。
短短既五年人生，我好似細細個就要去上Playgroup，但當時當去玩無乜野。自從我番學之後，我從未開心過。死，可能對我更好。對於這對父母咁出位的安排，有一晚食飯，與母親大人提起。母親大人除了叫「陰功」之外，還覺得細細個邊駛咁讀書法。
我絕對贊同一件事：若果年幼時被培養喜歡學習喜歡上課喜歡讀書，他在日後願意學習的機會大增。但若果一早已經怕上學，而童年開心快樂的時間比別人少，他自自然然會抗拒上課。
填鴨式至此，就算想試試兩邊哪間好，以為子女太年幼無所謂，結果得不償失，何苦呢？
沒有留言:
發佈留言