不過未講呢樣之前，先講商台製作。先介紹一件事，若果大家想睇足本重溫，一毫子都唔駛俾，上商台網站Install Hongkong Toolbar就有得足本重溫。
繼續以Point Form講感想：
- 今年口號「叱吒強」俾我感覺完全係無創意是但嗡，加上果隻疑似怪物吉祥物，醜！個台唔知想點，果個斜坡危險度百份百，明明年年有樓梯好地地又Trademark，點解要改？
- 我太耐無聽商台，當果幾位新DJ出場，除左唔明點解有乜野能耐講野口齒唔清既阿禮可以主持音樂節目之外，其餘幾位講野不斷在懶音邊緣游走，唔通呢ｄ就係DJ普及化，等大眾學生認為自己都有機會呢？
- 四個DJ扮老果段，我係收音機聽既反應係：又長又唔好笑Gag又爛，特別話謝安琪個仔同陳奕迅個女結婚，Bad Taste，繼續顯出商台缺乏人材。
- 對於森美頒俾Fiona果段好反感：近乎Sexual Harassment地去問一個女仔俾唔俾第一次佢，絕對明白當年點解有『你最想強姦邊個女藝人』選舉，亦唔明白佢得唔到教訓，更加覺得佢無料到：低級趣味當有趣，薛凱琪應該嬲。
- 容祖兒繼續唔知自己講乜：當二汶講出勵得村阿太請食飯係如何感人，佢又學人講，至慘係：唔明清潔阿姐講乜又當有人鼓勵，唔知俾乜反應佢好，Music Break又無啦啦叫大家支持不同界別歌手，歌手點分界別？性別下話。
- 接上段：森美出黎講果段向清潔阿姐囉金句，阿姐叫佢『行開啦！』然後叫大家靠自己，實在，好寸。
- 終於知道亞洲博覽館唔岩用，回歸會展，明智之舉；終於玩番唱票，緊張番少少，理你有冇造票，明智之舉。
- 我最喜愛場面肯定係卓韻芝頒獎，我最喜愛得獎感受肯定係謝安琪囉女銀與及at17二汶果段。
- 最後：據有份去現場睇既朋友話我知，全場最多人去廁所位第一位，竟然係，三畸？
要分上下半場：上半場新聞前係延播，佢地至核突就係果幾間唱片公司歌手感想Cut短之餘，人地唱歌就無啦啦塞班無關歌手新年願望：我聽完謝安琪被人剪到一截截既感想，突然出現Juno後台得獎感受，都算；後來係唔知點解又阿Sa又William又胡杏兒又張智霖講新年願望，呢ｄ唔該你放去東張西望啦，頂！
最離譜係：古先生果隻很危險第五位，陳柏宇第四位，播完陳柏宇囉獎，接上古先生唱歌，下？
下半場新聞後，個Show都完得七七八八，佢地無再塞訪問入去。當知道男女歌手金銀銅得容小姐唱歌播得，已經勁攪笑，心諗若果唔係容小姐而係薛小姐或者張太太，然後最後我最喜愛女歌手係張太太，基本上由男女歌手到尾無線乜都唔駛播！你話幾好笑呢？齋嗡直播！可惜呢個夢幻攪笑場面無出現到丫！
好喇，不如估下今年勁歌會點啦！
十首歌，容小姐一首，古先生一首，鍾舒曼一首，阿Sa一首（下？）林峰都可能有一首（下？）王菀之一首，側田一首，何韻詩一首，Juno一首，衛蘭一首，俾多個Buffer：吳雨霏一首。
可唔可以俾江若林囉呀？佢果首騷Ｕ好好笑架！再唔係徐子珊毒心術定係Hip Me呢？呢個都好笑架，走硬音既！
咦？傑出表現獎個候選名單有鬼：點解有蔡依林既？佢仲駛你嘉許？係咪會黎撐下場呢？
我相信係無左Mr情況之下，at17一定有獎囉，但我衷心希望佢地唔好去，咁核突。
不如估下容小姐囉幾多個獎：金曲搜神記，金曲金獎都係呢隻，最受歡迎女歌手，亞太區最受歡迎女歌手，廣告歌，俾多個華語歌三甲佢：埋單六個，穩陣少少，囉多個改編歌三甲，傳媒大獎仲唔係你？
本來睇唔睇都無所謂既勁歌，變成唔得閒都要錄低睇：因為要睇下無線今年會幾難睇。
最後問題：港台果個，亞視足本播，係咪一定有晒所有歌手唱歌呢？應該係架播，無線有冇辦法阻止呢？
沒有留言:
發佈留言