Sunday, April 16, 2017

常吃的小店

雖然跟家人住得很近,大都有住家飯吃,但有時口痕的確需要找好的來吃吃,可能是滿足那一剎的心靈需要,又或者有時真的不想煮,就要到餐廳解決了。

除了茶餐廳有心水選擇,其實有幾間小店也是值得介紹,因為好食,因為地道,因為他們都是努力地做生意,想用這一篇介紹一下。

我想位於水街的Big Dog的熱狗的確很得我歡心,特別是我吃過其中一款之後就從此愛上。他們用上很多不同款的香腸,除了經典款的熱狗,我最最最愛是他們的泰蔭功豬,沒錯,就是冬蔭功味的熱狗!

當然是即製的!香腸上的是泰式冬蔭功肉碎加蘑菇碎,滿滿的,惹味的!再加上最後添上的冬蔭功醬,這個熱狗大大隻四十蚊(我無記錯價錢的話)是我每次無法選其他熱狗的原因!

另外就是差不多每次都點的Buffalo Wings!烤得香口而有滿滿的肉汁,最重要是Buffalo Wings的酸辣很到位,開胃好味,我的必點推介!
還有他們的外賣紙袋都是自己畫的,還寫上一些句語,這個,很有心。

然後想介紹遠一點的,近荷蘭街的張記口水雞!曾經非常多人,現時也有不少熟客幫襯!他們賣的,就是川味鹵味,還有香港比較少有的北川涼粉。我呢,試過兩三次,工作很累,覺得要Cherish一下自己,就乘車下去,買一兩盒再加一盒白飯(十蚊咋喂),開開心心回家去。
第一項要介紹是夫妻肺片,有牛肚牛展與牛脷,非常大盒,要幾辣事先聲明,我通常都係中辣。小貼事:我覺得放入微波爐叮一兩分鐘先食,更好味!個汁呢,係無敵既,通常唔會一晚食晒,放入雪櫃,之後有需要囉黎送麵,不得了!
口水雞涼麵,其實都非常好味,只不過我份人,真係至愛果樣好少轉食其他!

有時會再點一份豬腸/豬肚/鹵蛋,呢三款都係我心水選擇!

留意番,放工時間唔少人走黎買番屋企加料,所以可能要等耐少少。

跟住想介紹水街頂Burger Guys,即係聖記仔(我果輩啦)一定知樂寶舊店,又,之前係吃什麼。兩位年輕人主理,當然主打漢堡,而漢堡扒是每日手打的。
食過兩次都係滿足非常,首先介紹呢個:Continental Burger歐陸漢堡。

每一項目都細心處理:漢堡扒質素唔錯,的確有肉味而且好好好Juicy(因為買番黎食,外層個紙袋開始濕,呢方面要注意一下),太陽蛋,生菜,芝士,煙肉,總之一咬,開心到不得了!亦因為食呢類漢堡包比較難攪,我住得近,都係番屋企食好。

煙肉芝士漢堡,太陽蛋換上大大塊厚切蕃茄,一樣爆汁,一樣飽肚。此店呢,要注意係,我真係唔知佢幾時開門幾時唔開,仲有,佢地除左ig真係無乜整個面書黎推廣,好蝕底。

最後介紹一間叫溫+飽既小店,賣既,係重慶辣野,小弟至愛之一,酸辣土豆粉。小店位於電車路對住嘉安街對面小巷旁邊。

通常我都係點呢兩款:酸辣土豆粉,首先用上香港好少食到既類近烏冬粗幼既粉,特別滑又有趙口,土豆並不是平常花生咁簡單,唔會太硬細細粒好香口,不過要提大家,此店的辣的確幾辣,我食中辣每次都食到出晒汗;另外會點十二粒重慶小雲吞,點解呢?因為粒粒都好飽滿豬肉,皮又夠薄。兩款都係四十幾蚊走人,你話幾歡樂先!

右下角係泡椒蓮藕苗,我就覺得我係大陸食好食D,不過久不久買然後放入土豆粉一齊食,係巧得的!

希望呢幾家小店岩你地口味,或者,有時會遇到我買外賣。


No comments:

Post a Comment