Thursday, March 19, 2015

上環好好食(一)

三月,搬寫字樓,由老蘭附近搬到上環,寫字樓大左,觀景開揚左,番工近左,實在是心曠神怡。不過最歡樂,莫過於遠離人多搵食難又貴既中環,到達完全係飲食天堂既上環。

短短三星期,呢間試下果間試下,中伏率低,而且價錢合理公道,選擇多,完全係令到每日期待食晏變成一種快樂。既然如此,慢慢介紹俾大家認識一下。


基本上我食既都好大眾化唔離地,而其實單單一條蘇杭街已經好歡樂。此篇,先介紹兩間好嘛?

首先介紹正宗雲貴川--此店,其實我一直想食,依家終於食到,我仲要自己Encore一次!地方淺窄,但每次經過都幾近坐滿,各位著得靚靚白領與及工友們都開心享受辣的感覺,當中最多人食既肯定係口水雞。但我份人呢,就對於酸辣粉係唔食唔安落既:


此碗乃豬皮豬肚豬腸腐竹紅薯粉,中辣,HK$47。首先辣係好唔錯,係辣中帶麻,不過網上評價有樣係岩既,就係湯底偏淡。但一定要讚既就係,每一樣餸都份量不少,俾七蚊一個餸條氣係好順,而且好好食播!
麻辣牛柏葉,是咁的,本人好愛既牛柏葉,去到邊都食。呢個HK$55,不便宜,但好多,而且呢個汁,真係好好好好好想打包番屋企,撈麵,撈魚肉燒賣,真係好食到唔知點算好,一路食一邊麻一邊標汗,但唔係超辣,真係好正。
口水雞單點要成HK$98,但跟餐咁上,同事點法,跟呢個凍薯粉,HK$55。究竟係咪個個汁都一樣呢?我覺得唔係,但又唔係好肯定,總之,真係好食。

另一間,文咸東街。文咸東街有間大快活,該大廈地下大堂另有一間好似Coffee Shop細細間叫Rose Home Kitchen,只有十幾個位,但每次食晏總有好多人等位播!

首先我都係上網發現此店,原來係可以訂位既!既然上網發現,我當然點最出名既食物啦!

呢個,西班牙紅酒焗鴨胸配薯蓉真係名不虛傳!典解咁講呢?當日約朋友食飯,佢話佢唔鍾意食鴨胸,但呢個一食,真係改觀晒!首先係烤過先焗,面頭再加焦糖。鴨胸份量十足,煮得剛剛好,肉嫩而入味,可以話醃得好好!薯蓉再配上紅酒汁係好不得了,成個Main Dish,極高水準!

當然,有讚都有彈,當日飲左個湯,蕃茄薯蓉湯,比較淡咁囉。另外加錢點左個甜品,Apple Crumble:
唔好意思out focus。係好家庭口味,賣相普通,味道不錯,不過下次我肯定加多少少,因為佢地好多自製蛋糕,好吸引耶!
最後杯啡,可以,只係想話店主好有心,每杯都寫少少畫少少上去。

留意番,此店夜晚開到八點。我朋友話想帶老婆黎食,佢真係要早少少喇。

No comments:

Post a Comment