的確，在香港我不是不捨得食，而是真的要確定好好食才捨得花，畢竟我對於那些賣噱頭或者叫我食裝修但食物一般甚至唔掂，咁我不如留返去外地食好啲。
最近食過兩餐中餐都非常驚艷，能夠有朋友帶去食，福氣啊！今次想介紹位於灣仔嘅嬌姐小廚。我連原本西灣河合時小廚有幾勁都唔知，但知道舊店無咗，依家想食，要去中環畢打街會所，都莫講價錢，你識唔識人訂先係問題。
當晚一行十幾人，早就已點菜，菜式大都令人拍爛手掌，席上非華人朋友都大讚不得了。
花雕鴨舌凍，賣相精緻，一放入口，花雕香氣湧上，內裡鴨舌爽脆鮮味，作為第一道菜，開了個好頭。
蝦多士，絕不油膩，而且又厚又飽滿，蝦膠足料又彈牙，高質啊！
香煎蓮藕餅，除左飽滿啖啖肉，調味剛剛好，而且煎得非常香口；韭菜銀魚小炒皇，必定要讚就係韭菜之嫩，非常好送飯！
呢個湯名堂太勁：鮮准山牛蒡螺頭燉豬𦟌鷓鴣湯，一放入口，係用左好多粒鐘炮製嘅鮮味！湯渣都勁好食！
雞油花雕火腿蒸馬友，果個湯汁，可以當湯飲！
極品茶皇雞係合時小廚名菜，茶味香濃而雞肉依家嫩滑；旁邊呢道菜叫白玉藏喜珍，冬瓜內藏住好多不同材料蒸熟再上芡汁，好清新！
越常見菜式越見廚師功力，咕嚕肉可算我食過嘅數一數二好食，每個細節都無忽略而且每件食材上汁剛剛好；梅菜蒸肉餅，豬肉鮮甜而且剁得好細緻，梅菜係帶甜嘅！若果當晚唔係咁多嘢食，呢個可以隊好多碗飯！
呢個鮑魚麵一上檯，大家都「嘩」出聲，咪以為得個樣，麵炸得爽脆又香口不油膩，上檯再加芡汁，不得了呀！
薑蔥焗中蝦肉蟹煎腸粉，我認我懶，因為齋食盡吸精華嘅腸粉已經夠滿足。而我呢個決定係正確，因為壓軸出場係痴線地好食！
中式菜館炮製嘅焗少爺豬扒飯，一上檯果一大窩飯舖住滿滿芝士已經香氣滿溢，佢仲要再加每人一隻煎日本荷包蛋，我可以講你叫我隊多幾碗都得！
呢餐我八到係九千左右，咁嘅陣容，咁高質素，我真係極極極願意俾，因為真係超好食！
沒有留言:
發佈留言