分後婚

活了這麼久，雖然沒有真正認識朋友經歷我以下提及的情況，但朋友的朋友遇過又確實有。有些情侶，拍拖很多年，當個個以為佢地打風都打唔甩，等飲佢地果餐，突然宣佈分手，然後，其中一方會跟另一個新相識拍左一年拖左右嘅，宣佈結婚。

雖然大家都明白，拍拖拍得耐，不太表感情特別好，或者可能就是「唔結就分」，原因不外乎大家互相忍讓又或者覺得依家先斬纜太遲，簡單啲講，就係無外力令到其中一方果斷面對關係。話說前陣子有一晚我如常去被教練折磨，聽到另一位教練跟其學生提及他朋友那個結婚的故事。

「我個同學呀前排結婚，個老婆真係好惡頂，又唔靚又多要求。聽佢講影完婚紗相唔滿意又話要再影過，然後順佢意去ＸＸ擺酒，其實只係下晝Cocktail，但同學果幾十萬積蓄無晒。」

「咁點解佢要同呢條女結婚？」

「佢之前有個空姐女友拍左四五年拖，同人分手，跟住就識左呢件。佢廿九歲之嘛，話覺得唔結就無得結，於是就揀左件咁嘅野。」

「下？一定要結婚架咩？」

「佢話喎，工作果行，結左婚有小朋友，先同啲老細高層多話題，覺得你個人定性，升職都快Ｄ喎！」

「咁佢又錯唔晒播，有啲老屎Ｘ真係咁諗架播！」

「不過我呢個同學一向都係亂晒籠，佢好細個就試過爭卡數爭到破產，屋企又錫佢播，家姐俾張附屬於佢駛喎，兩三年前先解除破產令之嘛！」

「咁依家呢件肯同佢結婚又真係好有趣播！咁你去佢婚禮俾幾多錢人情？」

「我一蚊都唔俾，我去到同佢講，我叫你唔好同佢結婚架你又唔聽！」

「丫你都幾仆街播！」

「其他同學都唔俾得多，因為睇唔過眼。」

其實隨年紀增長，經歷多了，或許會更清楚自己想要的是什麼，想跟怎樣的人一起甚至組織家庭。若果是這樣，多謝分手讓自己成為更好的人，然後遇上了對的人，短時間內結婚其實也不是什麼奇怪事。只是，若果為結婚而結婚，這肯定是錯的。

咁當然，若果你目標為本想搵個有錢人，梗係快快手結婚再生返件啦，唔係之後點分身家再離婚呀。