我祖籍潮州汕頭，細細個就俾老豆帶我去上環潮州巷，果陣叫垃圾巷食飯。而當年我印像只有好腥與想嘔，因為我呢個潮州人係完全唔得凍魚，細細個更加唔食魚。之後當然被好多次帶去尚興，因為，老豆同佢地好熟，我當年通常只會食幾樣嘢：沙爹牛河、蠔飯與及炸蝦蟹棗。大個之後，我周不時同一大班朋友去尚興，全盛期十幾人霸間房，打邊爐直落泡飯再加小菜，太子爺佳哥都識識地。
然後知道佢地唔做，分家，再開新舖。我從老豆口中知道好多背後故事，不過並不重要，重要係好唔好食。我成班朋友由十幾人到依家十人樓下飯聚然後海外果班次次睇到流晒口水，同時我地都承認，未搬之前，尚興出品水準跌左。我識果位太子之後坐落萬宜大廈以「尚盛潮州海鮮飯店」開店，我等一眾好友當然搵個時間落去食返轉。
當晚食得非常歡樂，原因係，我諗我地成班好耐無試過食到咁高質嘅潮州菜，簡單黎講，新店嘅食物水準回勇！得知就算搬到中環商廈地舖，仲用舊價，完全明白點解多客成咁，不過請注意，一定要訂檯，與及盡量早到，因為佢地係訂檯同安排座位上，的確有啲亂。
開餐當晚係星期六，七點前到達，已經有啲野賣晒，原來，想食啲乜，最好訂果陣留埋。
鹵水鵝片鵝翼好好彩食到，因為鵝腸鵝肝無晒，非常難過。豬皮紅都係被提水好叫喇唔係無，咁我係準時到，咪食到囉！
蠔餅係好食過以前，唔會油淋淋亦唔會一口木薯粉；蝦棗蟹棗，一貫水準唔會驚喜。
有啲慚愧我地成班茂利竟然未食過炒蠔爽！啖啖新鮮蠔仔，落胡椒粉之後，唔落魚露或者加少少去食，一樣爽皮。
清炒水芥菜，鮮甜好味，而旁邊呢碟水瓜烙，全晚較一般嘅一道菜。沙嗲牛河果晚係極高水準，你叫我隊晒一碟都可以。
呢個勁，手功菜，石榴雞與阪石榴帶子：將筍、冬菇、芹菜、蘿蔔與雞粒／帶子粒炒香再用蛋白皮包成袋，蒸熟再淋玻璃芡汁，我果晚食石榴雞，呢道菜係我地班痴線友去到尾聲發現有未食過果陣點，味道平衡得好好，清新！
尾聲喇！首先有水晶包，豆沙及蓮蓉任君選擇；甜三寶，就係銀杏蕃薯與及芋頭；綠豆爽，好多清心丸，滿足啊！
我地一行十人，除左以上之外另外點左胡椒豬肚湯與及檸檬鴨湯，開左三枝藍妹，埋單四千一（石榴系列特別係帶子比較貴），我地覺得非常抵食。有興趣不妨訂個檯試試！
沒有留言:
發佈留言