談談我的電視節目表

我都喜歡看電視，發現原來最近除了睇波之外，有些節目是差不多準時收看的，不如又談談我最近的電視節目表。

首先介紹的不是無線亞視，而是Now100台。逢星期六晚十一點半，有我認為至正至過癮的旅遊節目主持人杜如風小姐主持的《風行全世界》。唔識佢？佢之前係無記生活台主持兩輯《流行東京》，出埋書，以最地道最抵玩抵食的角度用最抵死風趣的方式介紹，從佢做節目方式深信佢都係廿三十歲左右，所以特別有共鳴。
一個唔該去Now，旅遊節目一去去巴黎，已經做左幾集，一樣咁好睇咁好笑，而且佢仲靚左添！想睇番？有Now就有免費自選服務，自己搵番之前幾集，咪走雞！其實《一個地球》都有睇，但成日唔記得，因為都非常喜歡有線過去既Tony洪永城主持，投入又好玩，講開有線，有線之花Priscilla黃翠如都去左Now喇。

星期六，我同樣好大眾化地睇《荃家福祿壽》。至今仍然覺得節目半粒鐘就夠，而且唔應該將一個攪笑扮野節目撈埋名曲滿天星，硬係要阿姐唱歌，好得人驚又格格不入。講番三位扮野高手，其實阮兆祥算係上一輩，李思捷與及王祖藍都屬於細心鑽研要扮既對象細節既一類，所以前者一拼後兩者個人覺得有少少輸蝕，不過阮兆祥功力不弱又有經驗，所以三個人拍埋一齊都不相伯仲。另外一讚係三個人都唱得，呢方面非常有利。節目一直微調當中，而且慢慢利用到現場觀眾互動，只希望真係添食之時無線可以趁阿姐無期就飛起佢，成個節目唔會唔湯唔水又更加好玩。

相反，我絕對厭惡收睇獎門人：一個節目已經玩到不斷侮辱女性與及玩核突，仲話自己係合家歡節目，低俗意淫程度已經去到日本半夜成日節目級數，只不過女星都有著衫唔係著水著。無創意唔好笑兼虐待狂，我唔會睇囉。

仲有：雖然無四大唱片公司歌手，《我的故事我的歌》竟然會係何紫慧？無線音樂節目水準係咪已經去到一個咁得人驚既地步？

講番星期一至五。

多數時間半夜十二點九我都會係高清台睇番《女皇辦工室》。處境劇由《同事三分親》開始玩寫字樓橋玩極都仲有，呢套特別之處係肯定唔會添食，所以係有限集數之下舖好各主角劇情。當中最大火花莫過於杜汶澤加何韻詩，特別係前者，角色無賴得來身世又討好，呢個角色絕對做得過，佢亦處理得岩岩好；阿姐呢？中規中矩，至少節奏可以Catch到，其他配角性格鮮明，當中以郭鋒與及鄧梓鋒最出色，最最最唔明白係：點解無線係咁捧金剛？

剛剛呢個星期開始追住睇《飛女正傳》－－一套瘋狂漫畫化劇集，但同時反映市面女性心態。蔡少芬角色非常貼近日常生活遇到既女性，缺點多多自視極高，所以當有呢個變身後大對照就非常有趣。三位男角性格背景非常不同，當中以黃德斌角色最好玩。呢套劇另一好睇之處就係對白好抵死，睇完一個星期係好有興趣追落去睇下會點玩法，當然，最後女主角同邊個一齊都好有興趣知，個人認為，未必係陳豪咁易估中囉。

係，其餘時間我都唔多睇電視，因為無乜野好睇，不如聽下歌算喇。