Saturday, April 16, 2016

紐約的日與夜:Woodbury Outlet

我想關於這個奧特萊斯(本人覺得至核突既譯名)應該係紐約又或者美國其中一樣非常出名既東東,因為好幾個朋友,包括我果位唔多買野既弟弟,竟然在我出發前都提到:喂好似話Outlet好平,Levi's啦Nike啦都好平,然後有次食飯隨口問家父要不要買Timberland,他又興趣滿滿,於是,朋友就在我這次行程最後一天,帶我到位於Central Valley的至大至多舖(好似係)既Woodbury Outlet

我以為都係到此一遊唔會買到好多野,結果,我呢個都唔算Shopping精都攪到由頭買到落腳既下場,完全可以話,呢處,邪惡到不能。


先介紹,此處開朝九晚九,有Food court,店舖數目好多好多同好多,所以我建議到場既朋友,都係去一去Market Hall,即係食野既地方。唔食唔緊要,但去囉番張地圖,然後Mark低心水必到店,再研究一下行程係必須既。至於有乜舖頭?不如睇人地官網啦!至於折扣?基本上都有七五折,識搵有心機仲有更平,Outlet可以買本平平地既優惠小冊子,咁當然無買啦,有店舖仲主動俾相同優惠我地添!
當日係星期五,朋友夫婦話都係第一次Weekday去,人唔多又天氣好,非常好行。不如講下我買左乜野戰利品,與及相關折扣啦!由頭講起:
買眼鏡你唔係咁癲下話!就咁既,果度呢,係有LensCrafters,朋友亦話我知,美國配眼鏡絕對唔便宜,我入去既目的,就係想搵搵有冇岩我既闊面眼鏡框,又真係俾我搵到呢副Oakley。諗左陣,覺得上一副黑框粗邊都戴左八年,咁買多副接力都好應該,呢個框要成千三蚊港紙,咁當然番黎香港再囉去配鏡片啦!

眼之後到個鼻:呢間叫Yankee Candles,入面既蠟燭款式多到飛起,而且味道好多花款,咁我真係唔抵得咁大樽買夠五樽就US$45,於是朋友揀左樽我就抬呢四樽番黎,找數時店員太太們好好,俾左特惠我地,結果加埋稅都係US$45.95,抵抵抵呀!
鼻之後到口喇播:朋友太太早就話我知呢度間Lindt好平,入到去,有試食,平到呢就咁既:後面七彩雜錦果個呢,七十五粒,廿蚊美金;前面呢袋一磅裝(約廿五粒)就特價五蚊美金,送禮囉番公司實在係非常好。
其實唔多買錶更唔捨得買貴錶既我,係Kenneth Cole(此店香港無代理多年)發現有一堆每隻只係US$19.99既錶!咁,就揀左呢隻喇!
又係Kenneth Cole!因為多年前係香港買過佢地果隻可以兩面戴既皮帶好喜歡,今次見到,買一條自己一條細佬,US$40!
Levi's!口口聲聲好少著牛仔褲,入到去,乜款都有,囉左去試,舒服到爆,重點係,買三條每條只係US$39.9(未計稅)!所以朋友買一條我買兩條,囉。
又係呢間呀!三對又夠厚料又舒服既番工襪,US$12。
Nike,其實仲有另外幾間大品牌,不過Nike真係最多人,愛波鞋既會好唔得掂,因為有斷碼貨亦有新款貨,我呢對因為見佢抵,只係US$39.9,所以,盒都唔要喇。
Timberland呢對買俾爸爸,US$90減到US$49.9!
相信下年再到紐約都應該再去,或者可以幫屋企人買都得! 

No comments:

Post a Comment