食在上海：老吉士與Beef Liberty

為何將這兩間放在一起？因為是第一餐與最後一餐，因為是酒店附近的餐廳。其實我是次出差都盡量食上海菜，一來我也頗喜歡上海菜，二來就算食得好，也不必要食一些其他地方都吃到的。

第一晚，飛機延遲又延遲，到達酒店已經八點幾，又累又餓。問酒店附近有什麼好吃的上海菜，他們給我兩個選擇：老吉士／鼎泰豐。咁，人在上海都好容易揀啦下話。

我真係唔知金色青島有乜特別。

我問侍應，你推介咸雞還是醉雞，於是點了他推介的咸雞。入味有咸香，肉質算嫩，但不算出色。

蔥油海蜇頭，呢個就好好食喇！除左爽口之外，蔥油調味好好，非常好送飯！

蒜泥肚絲，非常非常欣賞刀功！將豬肚切到唔似豬肚，底下舖著蘋果絲，完全開胃菜，半點肥膩感都沒有！

酸辣湯，好飲！酸辣平衡得宜，唔知點解食出好靚陳醋味，仲有用料足，無得彈。

一個人隊一碟蟹粉粉皮，真係爽歪歪，無過份調味，仍然充滿蟹粉鮮甜，我呢餐覺得非常滿足。

至於Beef Liberty，據聞灣仔都有，不過因為最後一日唔想諗食乜，於是入左去。

雲呢拿奶昔好滑好足料只不過用紙飲筒除左靚的確幾混吉，呢個炸芝士通粉，邪惡之霸！麵包糠炸漿夠香夠薄，我知肥死但實在超級好食！

呢個芝士蘑菇漢堡真係塊扒五成熟，一邊食一邊滴肉汁，用料多，扒靚，做得用心，整件事就已經好滿分喇！

下次介紹一下呢個全蟹宴。