娛人娛己：Swing《武當》

自從知道Swing重組，知道Swing唔係出一隻碟就唔玩，知道Swing唔係出新曲加精選而係大碟，一直興奮！需知道當年由Snowman至Swing的音樂無論Big Band Jazz也好Swing也好又或者Love Ballad均玩得出神入化，雖然歌詞有時水準飄忽，但好玩過癮聽得開心，之後因為各自理念不同而分道揚鑣。他們簽新藝寶我十分放心：此唱片公司絕對容許歌手有高自由度玩喜歡的音樂，所以，期望極高。

在電台聽Big Band Jazz的我有貨讓人雀躍，到未出碟前在卡啦OK邊聽邊睇幾首歌，歌固然好聽，但那四個上中下集加外篇的射鵰發神經MV先至精彩：找來黃日華劉丹客串，兩條友又扮埋一份，仲有好友女友玩埋一堆，又特技又爆破，一定要先向唱片公司致敬－－落本滿足呢兩條友天馬行空既幻想！

開宗名義回歸的我有貨大玩Big Band Jazz與及痴孖筋，大大公司再次開檔，歌詞乘上接下，熱熱鬧鬧，兩兜友唱得一樣咁放，先聲奪人，召集各方舊知音歸隊，開張總算來得有聲勢。

然後拿手慢歌Let it go，Jerald爸爸大師陳永良的以Bass及Trumpet拔刀相助撐乖仔（其實其他歌曲同樣有陳永良蹤影），將呢首原本輕輕鬆鬆教人放下既歌曲加入點點Jazz元素，聽得舒舒服服之餘亦有點格調。

攪鬼的Swing之後放出一首你以為係1984之類的歌曲，點知搵Wyman填一首麵包生命，我懷疑Wyman會唔會食方包，但佢以麵包可以配搭不同食物比喻人生可以好多可能性，過癮。呢首歌肯定可以做廣告歌，而且，越聽越肚餓。

接住同一理念，讓左腳先行一步，很Swing的編曲，寫的是叫人放棄平日最習慣最穩陣的事情，試試一些自己沒有安全感的選擇，可能會有另一新天地。

兩位現時已經是可以獨當一面的監製，今次自己炮製大碟，又豈只咁少花款？Hip Hop的點止兵兵林若寧歌詞好貼近流行話題，除了熱鬧之外亦極之諷刺現時娛圈，極易入腦又好玩！

Hip Hop過後來些Bossa Nova！尿床的啟示歌詞是全碟較為遜色，不過中段的Rap搶回不少分數；繼續Bossa的Hehehe所寫的極正：講身邊的縮骨精，呢樣都寫到，果然係Swing！獻給宅男的有鐘樓陀俠，簡單的Swing旋律與編曲，將沉悶的電車男生活寫得很Jazzy。

魚蝦蟹真的佩服林夕先生的詞：Wyman寫麵包，佢寫海鮮側寫環保，最抵死應該是這句：『吃到腹變胸，吃到檯也空，吃到袋也空，吃到海太空』嘩哈哈．．．仲食咁多海鮮？

埋尾的So Say We All是首很認真的慢歌，表面寫戰友戰至最後，其實應該是他倆堅持到底，放在最後，很有意思。

我還未有時間欣賞那張內容極之豐富的DVD，不過，只是唱片也夠開心。

這是今年Best Buy與及必買的中文唱片。