跟開我面書的朋友可能發現我完全無在面書提及我食過呢餐，原因有二：首先我係臨離開前的午餐去食，好食不過又未至於極推介（下文有講）；另一原因，當時同時間在進食有幾名香港人，面書朋友們都應該記得，我提過一餐唔開名的千一元Omakase（遲下寫啦）之時，有人叫我開名我唔開就unlike走左去，我費事有咁岩係果幾位朋友，咁就唔係幾好啦下話。
瞞著爹，位於該處有幾間舖頭，有熱食居酒屋，有香港人好愛既丼飯店，而此Omakase店有上下兩層，下層對著師傅約有十二個位，閣樓有兩張約每張可坐六位客人小桌子，基本上食客都要除鞋才可進入餐廳。午市的Omakase一律NTD1,680再加一。
甫坐下，就有人問想喝什麼，但又沒有提供飲料餐單，於是我就點了梅酒，結賬時知道的價錢，我的確覺得在台灣來說，好很貴。
NT$380。
食物至重要，對的。一開首，面前的盤子放了這些：
漬物除了紫薑及蘿蔔之外，青瓜與芭樂係燕喜而好食的。不過除左前兩款，後兩款好似無添過。
首先出現是這個，佢地用「沖繩海藻」黎介紹，我去過嘛，我知係水雲黎既。
又有少少小插曲：由於我是被通知訂位時間係點正或者點半，咁我就準時十二點到既，但到果陣幾位香港人應該早到，亦應該開始食，咁主廚呢，為左幫我趕進度務求令我同佢地個pace一樣，頭幾道，係上得好快既。
北海道紫海膽甜蝦，好食好鮮，都係果句，上得急之外真係好食既。
左邊兩片係經過輕炙既肉魚（我係後來再上網查，先知道肉魚即係刺鯧），與及右邊係鯖魚。不錯不錯。但後來有另一批台灣客人到場，此兩款份量又唔同，邊左一片肉魚兩片鯖魚。
金鯛壽司，加上青柑皮屑，這個提味方法當然好食啦。
鮮鮭魚卵壽司，鮮鮭魚卵就係自家再用醬油醃製，而唔係已經製好，而且是日本來貨，鮮甜非常，師傅介紹，秋天就一定食呢個，而我今次幾餐Omakase都食到，好喜歡。
唔駛介紹啦，真係大大隻啖啖肉既烤鮮貝，亦係其中一款人地可能食左我就食食下再上俾我既。
之前有竹筴魚壽司，但唔記得左影，台灣好多竹筴魚，日本人喜歡用作炮製一夜干。而呢個係紅喉魚壽司，經過輕炙，味道偏淡。
呢個係非常浮誇既：紫海膽拖羅黑魚子壽司，當然最好一啖食，放左入口好似靈魂出竅一樣。
鵝肝茶碗蒸，水準不俗，不過鵝肝咁放又好似有Ｄ浪費，味道上並不和諧。
我唔記得問呢個飯入面有乜，不過，唔驚喜。
原條烤馬友，好識食朋友望完相話，烤得好靚，而的確係烤得好香又好食，只不過魚比較多骨（應該咁，對我黎講，烤魚真係平日都唔食，不過Omakase出現我又會食咁解）。
蛤蜊清湯，有六至七粒，大大隻，鮮甜到咩咁，好欣賞。
結尾乃自家製柚子冰沙，好食。
主廚有同我吹水，知道我之前食左邊兩間，叫我有機會黎試下佢地晚市，1680以外仲有2980與及再貴一級，保證CP值夠高。不過咁，由於餐廳位置駁唔到線入去，所以餐廳只收現金不能刷卡，同埋唔知係咪好多香港人幫襯，比起其他餐廳有點偏貴（當然相比香港就贏晒啦），我想起
微風建一食堂個NTD1,500好似仲精彩，而想要高檔既旬採仍然無得輸（今次都有去，帶表弟去食好西），千一蚊果間我諗下次係一定再食既。
沒有留言:
發佈留言