在廁所問候你

Andy Warhol講過，每個人都有十五分鐘成名的機會，而依家更容易，因為久不久就有人在網上發表偉論又或者以為自己是對的希望網民支持結果換來成名柒出國際，不過由於江山代有才人出，實在要柒的人排住隊出現，當大家仲笑緊投訴炒貴刁辣果位港爸，另一位港男已經急不及待出場。

此港男對於某商場的廁所工人在他小解前向他講「早晨」與離開時跟他講「再見」覺得非常唔舒服，認為想出此政策的人理應被炒云云，咁，當然得到各大網民與其講東講西講到文都唔見埋果隻啦！有見於此港男的想法，我又想起我遇到的事。

話說我工作的大廈早於半年前開始進行洗手間大翻新，翻新得極之漂亮仲要有埋Dyson乾手機（每個廁所都有）與及無水尿兜（最後唔知典解失敗左要裝番有水）。而在翻新期間，我與同事除了有需要到其他樓層的洗手間之外，有時最快就是到商場的洗手間。

這個商場是中環的核心中之核心最最最高貴的商場，該洗手間在翻新後當然漂亮非常，隨之而來的改變還有：駐守的清潔大叔，他會向每位光顧洗手間的人講「你好」，離開時講「再見」。

當然，若果是外國人的話，大叔又真係會轉Channel，講「Good Morning / afternoon」與及拜拜。重點是，伯伯講的語會與態度：我想俾個例子，唔知大家有冇睇過楊千嬅與古天樂一部叫《乾柴烈火》既電影？其中有段戲係，楊千嬅每晚走去幫古天樂屋企裝修，古天樂屋企個看更每次見到楊千嬅都會大大聲叫「李太～」，無錯喇，洗手間大叔就係用呢種咁誠懇態度向每位進出人士打招呼，不特止，佢仲面帶笑容非常自然地打招呼。

非常坦白咁講：起初對於大叔打招呼，我係唔多習慣，亦覺得有少少怪。不過我明白亦相信，此等指令應該係公司決定，而且，其他洗手間員工，又的確無佢打招呼打得咁誠懇有禮而自然。

我同意有朋友指出：香港人的確唔多習慣其他人對自己禮貌，雖則未至於陰謀論地覺得你一定有Ｄ野，但總會先抗拒與防避。反而外國人，我眼見，對於大叔打招呼，都會微笑回應Have a good day。

我覺得大叔如此敬業樂業，於是，慢慢都會跟大叔有回應：佢同我打招呼我會笑一笑點一點頭，講再見我都會講番再見。無他，因為我覺得，任何人於任何崗位能夠盡力全心地工作，單單這一點已經值得欣賞，更何況這位大叔將此等有人覺得硬膠的政策演繹得自然有禮又有Energy，你又點可以視而不見呢？基本回應一定要做啦！

其實有時設身處地想想，若果你係呢位阿叔，要你咁客人咁樣樣打招呼，一日當值八粒鐘，又點樣可以做到咁有heart呢？想到呢度，當你在工作上遇到西人西事，忍一忍，專業ｄ，自自然然先交到戲架嘛！

有時你明唔明：點解有人可以升職快過你？佢未必做野叻過你，但佢可能專業過你，處事得體過你。