重遇曼谷：海鮮大餐Laem Charoen Seafood

話說我之前與同事提及，Nara生蝦唔夠好食，佢地話去海鮮店食就唔同喇。於是某日既Lunch佢地帶左我去呢間叫Laem Charoen Seafood既餐廳，有好幾間分店，我地當然去Central World啦，近Office嘛。

真係Lunch，因為點左同食左既，真係飽到咩咁，而且，我再次叫佢地隨便點地道菜式，等我唔好次次都食果幾味嘛！餐牌製作認真仲非常之厚，我想起之前試過去某餐廳，寫到明本餐牌若果囉走要俾幾錢，我諗呢一本都唔會平。

不如先睇第一道菜：你地估估係乜？

唔係甜品，而係蛋漿混入魚肉，變成魚糕。無過份調味，第一次食，感覺好似蒸老左既蛋，唔係特別喜歡。

呢個蟹肉炒飯好得！首先蟹肉真係啖啖新鮮而且量唔少之外，個蛋炒飯好有水準，粒粒都有蛋香而且唔油膩，你知唔知唔易做到架？配上青瓜片加魚露，味道又好唔同喇。

呢度既生蝦係咁既：蝦拆埋殼浸於淡魚露汁，旁邊一碟就係蒜片啦辣椒啦蔥頭啦青檸等等，自己配乜黎食都得，好鮮甜呀，我差唔多食晒。

我唔記得呢條乜野魚啦但我想講呢，就係炸得非常好食，炸漿薄，炸得好透，骨都可以食埋，加少少青檸辣汁，特別開胃。

呢個係乜？青咖喱蟹肉呀！係新鮮拆晒既蟹肉，青咖喱又香又滑，囉黎送飯真係食多幾碗呀！

炒明蝦球，無乜特別，料就一定新鮮既。

我先頭以為呢個又係另一款冬蔭功？味道咁濃既？點知同事話，呢個係咖喱湯配上臭草煎蛋。只能講，唔係咁岩我口胃。

泰國既炸鮮魷：花枝片一條條切到開晒花再加炸漿去炸，而新鮮蒜粒一樣加炸漿去炸，難得係並不油膩播。

其實飲埋杯椰汁都飽到上心口，但當我見到甜品，又唔記得左我係飽。

據聞呢個係本地出名高級椰子雪糕，係好好食架！但同事話，其實好多餐廳自家製既應該更好播。

總之，呢間實在係水準高又食得好滿足，幾個朋友黎食就最好，因為可以點好多好多好多樣野！