我在吉隆坡開飯（二）

其實我一直有個疑問：當我係新加坡都食過馬拉菜，來到馬來西亞好似食物款式差不多。咁又其實有乜好食呢？不如呢一篇就寫寫由同事帶我食既三餐啦！

好有趣，當東南亞國家朋友鍾意食香港點心，來到香港一定要食，但其實當地點心好多時可能做得比香港更好食！某一個午餐，佢地帶左我去一間叫雅軒Elegant Inn既港式酒樓，結果點呢？

點心款式不多，但絕對係原汁原味足料無味精，即就係食到最正宗點心喇！我地點既都係好基本既點心，但的確係好好食：

有眼睇喇，蝦餃粒粒飽滿，大大隻蝦竹筍都齊，蝦係新鮮既！叉燒包，包身鬆軟，一咬入去叉燒香甜，餡料份量剛剛好，一咬就知道。

點解特別講呢個炒蘿蔔糕？因為我想話，XO醬足料，芽菜韮菜都係幼嫩——因為我好怕韮菜老會痴牙，蘿蔔糕足料唔會好粉，每個細節都食得出無欺場。樣樣都好食，結果最後個甜品就：

呢個係乜呢？咪以為係凍檸茶碗上播。話說我與同事分別點左兩個熱一個凍，等左廿分鐘先上檯，一飲，我覺得好似凍檸蜜，而呢個實質係海底椰煲龍眼肉糖水，好鬼趣緻。

然後，Madam Kwan，就個個都叫我去食架喇。集團經營，當日光顧KLCC分店，食左呢Ｄ：

椰漿飯真係好好食！個咖喱汁又辣又甜，魚乾香口，兩件雞入味而嫩滑，個飯若果齋撈汁我都可以隊兩碗，真係好味好味好好味！

呢個係同事點既奶茶，有趣係附上兩粒我地幼稚園年代既花花餅仔。

炸香蕉呀！真係無介紹錯，首先完全唔會過甜，然後炸漿夠薄，香蕉甜味帶出，加上呢個Vanilla Ice-cream，無得彈呀！

最後，點都要食肉骨茶，由於開會遲左，只可以到商場食呢家叫寶香綁線肉骨茶！同事話，你想點乜自己點，份量唔大份喎：

由最遠數起：豬粉腸，豬肚，排骨。每一份好似好細碟，而且好有心用酒精Jelly點火保暖，而其實你飲過一啖湯你就知道正，當然，配上白飯，真係停唔到口。

之後就介紹幾餐唔算平既俾大家。