平民貼地手製Pasta：Foodo

話說睇鄧健泓演唱會當晚，與師弟及其另一半飯聚。旺角嘛，要食得好又有新意又唔駛趕頭趕命，我偏向自己搵。又因為之前睇過期飲食雜誌，介紹過一家位於女人街內小店，就係見介紹寫手製pasta，仲用日本雞蛋，作為意粉迷當然想試試啦，雖然，女人街內小店，都中過唔少伏。

小店叫Foodo，我先到達，佢地要求到齊先可以入座。明白既，小店座位不多。門外看到餐牌，賣意粉，薄餅，小食仲有甜品。

好，坐定定，首先介紹係薯仔沙律！無錯，薯仔沙律！猶記得某集深夜食堂都有介紹呢樣大家以為無乜特別既食物，但我話你知，要做得好食係要技巧既！

 

此處薯仔沙律有洋蔥青瓜紅蘿蔔，薯仔蓉做到細緻幼軟，調味輕手，所以食到食物原味，這個薯仔沙律非常高分。溏心蛋都好好食，你見個蛋黃顏色與質地就知啦！其實仲有其他小食想食，例如有個煮蜆，我地晚市第一批客人，晏晝已經賣晒喇嗚嗚。

 

意粉加錢就有湯飲，是原汁原味好飲的，呢個唔記得有無記錯好似係甘筍蘋果湯，偏淡，但好飲。附送麵包好鬆化，無是是但但俾差野你食。

自家製水果冰茶，跟餐唔駛加錢。以錫蘭茶蘋果與橙加微糖漿再雪凍，絕無加冰，非常好飲。

意粉係即叫即製所以的確要等一等！我呢個係忌廉汁芝士菠菜配手製闊麵加日本生雞蛋，首先一嚐麵條，Al Dente！我最怕煮到無晒咬口既麵，另外，真係有蛋香，手製麵同買番黎絕對係兩回事；忌廉芝士汁不會太濃，整個pasta好有家的感覺！要記住播，呢度係旺角女人街，收你八十幾蚊一個pasta有如此質素實在非常驚喜！

師弟點左呢個today special，烏賊意大利麵！我無食過，但我話你知，佢食完呢餐，話：「梗係我請啦師兄你介紹我食好野呀！」

師弟另一半選左薄餅，份量足，好香好香，絕對不比意粉遜色。

事發經過是咁的：師弟見有其他食客食一件非常精美既蛋糕，咁到食完意粉準備叫啦，典知賣晒！真係晴天霹靂，佢最後就問餐廳有乜甜品都照殺，呢件抹茶紅豆忌廉蛋卷，都非常之好食！師弟就話，佢一定要再黎。

其實我到寫呢篇網上查一查先知原來此店由兩位無線藝員／前藝員開既，都無乜關係，我好欣賞個pasta，仲要試試其他小食甜品！