上海好好食：桂滿隴

據聞，這間是上海近日非常大熱的餐館，跟同事提議了，他們表示沒有吃過，很雀躍的要去試了。跟他們會合那晚，他們已經做足功課：加了這家桂滿隴的微信，然後才可以提早拿票。因為我們那晚七時前到達，門外等位的人很多，很多，很多。店家更放了兩大排木凳，好讓等位的慢慢等。

這家主打杭幫菜的菜館，好像在全國也有分店。當晚我們一行四人，試了很多菜式，的確是價錢實惠味道出色而且亦坐得舒服，店舖內的裝修很特別，只是略嫌比較吵，很難聊天。

  

其實我係無乜俾過意見，不過為左睇到餐牌就焗住用微信俾佢睇我乜乜物物名單先睇到餐牌。當晚盡興而歸，首先係呢一碗：

乜黎架呢？係一公升三度龍碗米酒，入面有蒟弱，酒味不濃，非常好飲，喜歡到不得了。我亦同意果片菠蘿上既實在唔多好睇。

吮指雞爪，醃得非常入味鬆化，只係微辣，好唔錯。

呃like度爆燈既南乳花蛤，花蛤大大隻用南乳煮真係第一次食，味道原來好夾。你咪睇佢又乾冰又剩，份量係唔小與及呢碟只需十八蚊人仔。

 

我就未食過既，呢一道叫蜜柚爽口冰草，冰草葉面好似結左冰咁，配上特製胡麻醬，爽脆好食！

此道又係我非常喜歡：孜然菠菜！未諗過孜然煮菠菜，而菠菜係煮到仲係爽口，好有趣好好味！

南方沸騰蝦球！麻辣得好過癮，蝦亦多又大隻，咁既陣容六十八蚊人仔，超值！

香蔥昊山烤雞（一隻），下面有火熱住，雞嫩有雞味而且醃得入味，係非常高質既烤雞！

荷仙菇野生菌湯，清生抵飲，四個人每人兩碗只係三十八蚊。

甜筒沙律，玩意黎既，不過沙律幾好食，甜筒又脆，盤內爆米花都食得。

 

另一呃Like之作：風味炒米線，將炒米線放入錫紙包點火上檯，本身都好食既。

東坡肉！點好食法？幾位女同事不顧身世又話飽結果都每人食左半件，係好高水準既！

最後呢個，必點：黃金蛋黃土豆絲，即係咸蛋薯條！去到尾聲先出現，女同事好似唔記得左飽，再食！

以上咁多再加埋酸梅湯，都只係四百二十幾蚊人仔，你地明點解排晒隊啦！