作為越南生牛河的超級粉絲，首到越南，當然要食生牛河啦！但，唔知出發前有人同我講，定係當地同事同我講，越南本身牛肉唔係特別靚，生牛河好食係在於湯底與及河粉，至於牛肉，唔好抱咁大期望。
無論如何，我都食左好多碗牛河，的確，牛肉無令我覺得驚喜，而比較失望就係，幾碗係全線有味精——當地同事表示，落味精係平常事，只係落得多與少。聽落係咪好失望？唔好咁，睇睇我介紹先：
第一日到達，放下行李抖一抖，問酒店附近有邊間食牛河好介紹呢？佢地叫左我去Nha Hang Ngon。行到去，發現充滿遊客，已經覺得可能有伏，奈何實在比較累又餓，唔理喇，叫野食先：
英文係咁形容既：Small stuffed glutinous rice flour balls，我睇相，以為係類蒸粉卷，結果上檯係咁，好咸，浸滿魚露，果幾舊野，凍冰冰又硬，內裡有類似蝦米肉碎，總之，難食。
作為首碗生牛河真係好好好鬼失望：生牛肉都算係生既，但無乜牛味，湯底偏甜有味精，最離譜係，河粉煮唔透！你話點可以咁！留意番，越南食生牛河，芽菜呀金不換呀青檸呀辣椒之類無限量供應。
我都好中肯既，牛丸係較為好食，但個湯都係，好甜。
成餐最好味道係杯椰汁囉。
第二日，同事得知我咁不幸光顧呢間（佢地表示，以前就好好食既，因為賣既都係越南街邊食物，但之後賣左盤，成為遊客舖，就非常之唔得喇），表示近近地帶我去食過碗，呢間Pho 24，連鎖店，四圍都有：
套餐黎既：呢碗特別牛肉河，有牛展牛腩牛丸，好食，而且湯底清甜（唔會無味精不過比較少），同事教，將各種香葉撕成細片，加入是乜叉旦辣椒醬與及青檸汁先係正統食法，係播，好味好多播！
套餐另外跟春卷或者粉卷，前者脆口不油膩，後者清爽加上海鮮醬好好食，無得彈架！
套餐仲有甜品播，呢個椰汁西米芋頭，清甜充滿椰香，最重要係套餐加埋只係唔駛VND80,000，三十蚊港紙都唔駛呀！
同場加映：Pho 24有即食牛河賣！三十幾蚊港紙有七杯，我係當地食過一杯，真係得，所以掃貨番香港。
然後臨走果朝，學下越南人，早餐食牛河。呢間叫Pho Le錦麗牛肉河，當地朋友介紹，位於第十區。我搭Uber過黎仲貴過碗粉（都係唔駛三十蚊港紙），一黎度見到坐滿咁滯，都係本地人：
雖然湯底都係有味精但牛味好足而湯底較清，河粉細滑又薄，牛肉算好味，重點係，咁大碗，廿二蚊港紙左加，係好唔錯架！
臨走一餐，去左SH Garden，一間位於三樓都有唔少遊客幫襯既舖頭，半露天好開揚。
越南食野呢，侍應好好既，佢會話你知：份量好大架，你一個人食叫咁多實食唔晒，主動幫你叫少幾樣。於是，我點左呢個多款卷物：炸既係蟹肉春卷，超超超超超好食！中間包住塊紫蘇葉既係烤豬肉粉卷，都好唔錯，仲有果個就係粉絲加豬肉與蝦卷，我就唔知用左乜野葉去包喇。
至於呢碗特別牛肉河，一般啦，湯底真係毫無印象可言，牛丸好味，牛展一般，下次唔會再點囉。
我再去一定會試其他越南河既！
沒有留言:
發佈留言