瞬間逃離中環的Ole Spanish Restaurant

第一次到這餐廳果真不算好找：位於雪廠街，而餐廳門口極低調，更容易被餐廳招牌誤導進入另一店舖。不過，當光顧過第一次，就自然想再去——因為，就算位於中環，到這餐廳用餐，彷彿突然不在中環，好像到了歐洲小餐館一樣。我講的是Ole Spanish Restaurant。

除此以外，餐廳食物很不錯，而午市套餐是抵食兼好食——都係果隻，久不久對自己好少少的選擇。不過請記得，此餐廳午市真係要訂位，好爆的。

點解我會話唔似係中環呢？希望呢張相可以解答到：

除非有巴士行經，否則望出去真係好唔中環，仲有好英國殖民地感覺添。午市套餐分三個courses或者四個courses，玩法係，可以餐牌上任選（不過由於西班牙部份主菜真係好難俾一人份你，你揀部份主菜要兩個人一齊揀同一款），三個跟四個分別就係無Tapas，價錢？190vs260。

未入正題，以下係檯檯都有，得！

左邊，西班牙肉丸，右邊，薯仔沙律。絕不會因為送俾你食而是是但但，兩款都好高水準，前者蕃茄汁原汁原味，撈飯都得。

想知人地餐牌有乜你揀可以上呢度睇，不如睇下我食過乜：

呢款係墨汁海蝦杏仁釀小魷魚，沒有刻意調味，食出原材料新鮮與鮮甜。

另一款Tapas，Anchovies，都唔駛點介紹，我既至愛。

之後就係湯或沙律，咁又試過乜呢？

忌廉海鮮湯，無記錯應該有用酒煮，香濃好味。

呢個清湯又係乜？五小時清燉傳統牛肉黑毛豬濃雞湯，所以，啖啖精華。

呢個叫西班牙沙律，其實都係果ｄ野，不過新鮮同埋個油醋汁好唔錯。

主菜喇播：

Segovia烤乳豬，朋友食既，俾左我試，香口皮脆。

呢個係雪魚柳伴墨魚汁飯，雪魚柳外層用芝士烤焗，好好味。

呢個就二人份喇：Catalonian noodles and seafood paella，當然要少少時間等因為真係即叫即制，份量其實兩個人食唔晒，而且足料好味，海鮮好新鮮。

甜品喇播：

西班牙油炸鬼Churros，點一點特濃朱古力醬，難以抗拒。

Tiramisu係好有水準，酒香咖啡香好平衡而且鬆化。

西班牙米布甸，清甜之選。

套餐仲有咖啡茶，呢個陣容呢個質素仲要餐廳位置靜中帶旺，中環想食好西，呢間絕對去得過。