假若有人要你賠償...

有網民將近日有人在酒樓被茶客濺濕鞋又報警又召喚救護車一事說出來，是要聲討有人態度囂張小題大做。該網民目擊下半場，向被索償的太太表示有什麼事可以找他作證。

看到此事，職業病發作，覺得可以寫一些東西提點大家，若果遇上類似事情，可以如何處理。一般人因為另一個人的過失而引致身體受傷或財物損失，當然有權向引致他受傷或有損失的人賠償——重點是，那件事情是意外，還是真的有過失，若果純屬意外，未必需要負上任何責任。

我不打算在此解釋何謂有責任何謂純屬意外，就當真的有過失需要負責，一般人都不會就自己買第三者責任保險（工作期間是公司負責的）（又，有些旅遊保險有第三者責任保險的，你若果在旅行期間遇上可能引致第三者受傷或財物產失，旅遊保險可能幫到你），那麼，應該如何處理呢？

以下所寫純粹作參考，本人並不代表任何專業法律意見，亦不會就以下建議負上任何責任。
（梗係要戴番頭盔先啦）

首先要明白，就當你有責任，不代表對方要求什麼也要答應，因為在民事法上，可以要求的賠償，若果是有數得計的（例如財物損失或者醫療費用），是要合理及直接跟意外有關，而非有數得計的（例如情感傷害呀精神創傷之類），是要有醫學根據再依據類似案例作參考去計算的。

套用上述例子，就當該阿姨真的有責任，那名當事人大大聲要乜要物之際，請記住，千祈不要慌張，還要有耐性，最好還是先提出要報警及召喚救護車。

為何呢？通常這些有心攪大件事的希望聲大夾惡拋窒你，若果你淡定同佢玩，佢唔知你乜料，可能會無咁放肆。

先針對被濺濕的鞋（老老實實二千幾蚊對鞋扮乜野上菜呀），濺濕是事實，但是不是代表整對鞋Total loss呢？你可以同佢講：「我會影低你對鞋影響程度，然後你可以搵番原廠囉個報價有冇得整，若果話無既，唔該證明你對鞋幾時買，我有權計折舊，若果我賠番對鞋既錢俾你，即係你對鞋唔要得啦，我有權要番佢。」

以上對白幾個要點：就算我令你產物有損失，要賠都要合理，你乜都無就叫我賠足俾你，警察黎到你大可以要求警察落案，叫當事人唔接受的話，即管出信告你。

點解可以咁講？因為若果觀乎事件咁Minor，佢要你賠既，通常都唔可能超過五萬蚊，即係小額錢債啦，上到法庭你估佢俾官鬧定你俾官鬧呢可？你分分鐘仲可以搵埋目擊網友幫拖添。

好，去番佢隻腳：你話燙傷，唔緊要，我跟埋你去醫院，你俾番受傷醫療證據，有幾多度燙傷有幾大範圍公立醫院私家醫院都無得呃，基本醫藥費要俾，無問題。

咁仲有乜損失？若果醫生話佢唔可以番工，幾多日既工資按道理都要賠，不過可以要求對方提供請假證明與及工資證明——我點知你係咪照番工架。

若果佢話乜乜精神心理創傷，唔好同佢拗，叫佢真係有事就出信俾晒醫生證據先講。

當然，大家要明白，呢個世界真係有人會同佢癲，因為佢地有的是時間與及金錢，若果自己有責任，合理的話講掂數費事煩都係辦法，就正如發生輕微交通意外，通常都係傾掂數簽張紙互不追究就算。

所以，記得記得記得，講掂數都好，捉個第三者做證人，手寫解除責任協議，一人一份無拖無欠。

好，就寫到呢度。就此事件果位網民，其實你無責任上身，不過若果你挺身而出的話，果兩位臭四就唔會咁囂張，下次不妨試試。