2016星洲出差：食盡東南亞（下）

其實以下介紹有部份都唔屬於東南亞，不過亞洲菜就算。當然，好食先介紹過你地啦。有說星洲人好愛食辣（我知）與及炸物（呢個唔知），可能就因為咁，十幾年前星洲人俾我印象，比較多面油與及皮膚麻麻。

但我又相信，有好野食，點可以唔食？就算要爆瘡都係咁話，特別我呢類過客，食左先算啦。先介紹一家叫Bangkok Jam泰式餐廳，由於與公司很近，所以食過兩餐。

首先要留意，午市原來係有餐，不過只係寫左係一幅牆，但餐牌無寫。玩法就唔記得幾多錢，可以揀大部份麵食，另外有春卷甜品飲品。

我呢碗係泰式牛河，一試湯就想起好多年前去泰國食過既，好多香料好複雜但好泰國，略帶酸辣，極喜歡！可以見到同事食Phad Thai，見炒得好靚，不過份量就比較少。

第二次食海鮮冬蔭功，個湯底係正宗我喜歡果隻，海鮮份量可以啦！

春卷熱辣辣香口又脆，絕對唔係因為跟餐上而走樣。

呢個明顯係創意料理啦，蔬菜粉卷，重點係個醬汁，係令我好想問：午市有冇生蝦刺身？不過留意，食過海鮮粉絲沙律，非常失望，勿點。

送既甜品竟然係椰子雪糕！天啊，清甜到不得了，跟餐上就更覺得正啦！

都知我呢個台北精之前介紹過舒果啦！原來佢地都係星加坡有開，午市有呢個三道菜SGD15既午餐選擇。

基本上與台灣餐牌非常相似，此店可以用iPad點菜，有相有詳細介細，非常好。

野菇湯，焗鮮蔬芝士通粉，蔬菜提子汁，每一樣都保持水準，絕對推介星加坡朋友去食！

最後介紹呢間新興韓國甜品店，食既叫做Bingsu，價錢唔平，但有乜好食呢？

呢個係Premium Sesame Bingsu！個面舖左果仁片啦，黑芝麻，紅豆泥與及年糕，另外有一小杯鮮奶。

裡面既綿花冰，本身帶甜，但最強係好像雪花咁輕身綿密！好好味啊！好適合朋友一齊食，你一匙我一匙，仲唔開心到不得了！