2016星洲出差：再來Marusaya

猶記得去年二月誤打誤撞食過一次Marusaya，水準之高質素之好味道之佳實在讓人念念不忘，今次都安排一晚再去，帶同事食好野，順便吹吹水享受一下。於是，麻煩在地朋友幫忙訂位，因為我記得，此店實在有不少日本朋友來Happy Hour，不訂檯怕會無得食。

出差可以出公數當然食好d，大家計好條數，決定兩個人點呢個A5宮崎和牛Shabu套餐，兩位起每位SGD129。好似好貴，但我同事一邊食一邊話，無介紹錯，果然物有所值。

究竟呢個套餐有乜野食呢？我盡量介紹啦，因為有部份係乜，我聽完又無記低咁囉：

第一道冷盤：腐竹皮上放了蟹肉，浸在冷高湯Jelly，略帶點酸，非常開胃清爽。

這不是茶蒸碗，也是凍的：我食到有鮮奶有海鮮湯既蛋白，滑溜非常，配上三文魚籽絕對驚喜。

這個是冷汁煮鴨胸，呢個調味汁不油膩但味道豐富，配上煮得剛熟鴨胸與及其他蔬果，我真係連汁都飲埋！

刺身！我真係唔記得邊隻打邊隻，總之配上青柑汁鮮甜好味，最重要當然連紫蘇葉食啦！

這個是烤銀雪魚及燒銀杏！魚上放上甜面豉醬，跟魚一起吃，好香好美味啊！

侍應先用一整塊昆布煮成清湯，再加入自家製木魚絲再煮：

呢個湯清甜到不得了，再睇睇和牛：

見到油花有幾豐富未？另外附上不同調味料，我最愛就係柚子胡椒及麻醬！

侍應建議先食蔬菜，果然帶出蔬菜甜味而且湯保持清澈，重點，當然係牛啦！

我真係唔識形容，入口即化嫩滑非常，配上不同醬料感覺完全不一樣，非常讓人滿足！食完呢，仲有播，就係可以選擇叫侍應將精華湯底煮烏冬或者粥：

同事話平時無食咁多野，但今次真係停唔到，由頭好味到尾呀！

最後就係呢個甜品喇，久不久食豪少少，最重要係物有所值嘛！記得想食就一定要訂位，下次我會試下佢地既Omakase，要早一日預訂，有SGD100及150兩個價位播。