紐約的日與夜：扒扒扒

一個如此為食的人，若果出發去一個地方之前朋友已經不斷告知「紐約無乜好野食」，的確對此旅程期待度大大減低。在這次實質四整天的行程，食得最多的，是扒，與及生蠔。

扒嘛，實在有點期望的，因為呢樣照計係外國人最耍家架嘛。當地朋友好努力幫我Book果間Peter Luger但不成功，不過都好有心，明查暗訪搵到另一家，於是，第一餐扒，就去了這家位於W 44th Street的Strip House Midtown。

一入餐廳，七點前，好多客，特別係西裝骨骨既，應該係happy hour直落果隻。

由於之前食左餐好勁（放心之後一定會介紹），咁，兩個人決定選兩個Side Dish，另外點左Dry-Aged Porterhouse For Two。

麵包係好好好好食，果兩條唔係腸，都係麵包。

扒未到，每人一隻碟放上呢個，蒜頭呀喂。咁呢，之後就有專人囉左好大塊扒出黎，當住我地切切切。

未食就放番上pan熱住。好喇，好大期望播，仲有個house steak sauce另上播。一咬入口，面層黑椒海鹽略帶焦香好吸引，不過再食就發覺，咦，入面真係無乜味。無味唔係無調味咁簡單，而係無乜牛肉應有既鮮甜。最弊呢，就係有筋囉，你話幾失望！個Sauce先奇！我覺得似cocktail sauce多d，咁點會同扒夾呢？

Side dish呢，炒雜菌除左大碟之外又唔夠熱又唔香口，反而呢個菠菜好好味！有黑松露而且creamy！不過主菜唔得，好愁播！正當我地埋單侍應問呢餐點，我地都好坦白話個扒唔得，而同時，我地發現兩個傻仔睇錯餐牌：原來呢個Dry-Aged Porterhouse For Two係六十蚊一位！無得怨，當我地準備找數之際，經理過黎問：「請問覺得塊扒有乜問題呢？」我都有禮貌咁講佢知。當佢知道我地來自香港（哈，我朋友反應太快話自己來自香港唔係居民），經理話：「I will handle the steak」，然後，成份扒US$120唔見左，張單得番兩個Side Dishes，連稅只係大約US$30。我同朋友都非常唔好意思，又唔覺得個扒一文不值，結果我地俾左大約US$70走人。

另一個扒，係Business Dinner，餐廳叫Circo，意大利餐廳。對此餐廳總體評價係前菜與甜品好好食：

呢個椒鹽炸意大利青瓜真係好味，不過好似係送架播！之後我飲左一個叫Zuppa Alla Frantoiana，係有三十種蔬菜既Tuscan soup，無味，唔好飲既！咁主菜我又叫左扒：

賣相好得呀可？好食過之前果個架，不過呢個medium rare就有d overcooked，同埋塊扒個面炭味好苦。甜品好有趣，餐牌上面寫dessert harmony，結果係每個人面前得到既甜品都唔同：

果兩個有餡既包與及呢個朱古力布甸都非常出色！

臨番香港前一晚，或者朋友真係聽到我之前兩個扒都強差人意，帶左我去New Jersey既Arthurs of Hoboken。此店平民化好多，價錢亦然，俾我感覺充滿西班牙同墨西哥風。

我地先點左呢個大份到嚇死人既蒜蓉包：

果真係鎮店之寶，好香口架！不過我就更愛呢個，Bowl of Chili：

簡單黎講就係墨西哥辣肉醬，唔知大家仲記唔記得Wendy's？當時有得賣呢個墨西哥辣肉醬飯，呢款就係非常足料與地道，有好多肉碎啦辣椒啦紅腰豆啦蕃茄咁，連埋蔥花與芝士，好味到呢！

我個主菜呀！叫Arthur's Filet Mignon！肉質唔錯，而且磨菇汁好得，配上Creamy到不得了既薯蓉與及烤露筍，抵食好食！

朋友呢個叫做Our Steak - classic ribeye，喂，大份成咁，又Grilled得幾好味，果堆薯仔好似唔駛錢咁，結果佢地兩公婆都打包唔少野番屋企囉！

希望下年再去果陣可以食好扒啦！