蝗蟲首襲大榮華

話說，我有一班好拆得既朋友，我地久唔久就出動去食，食起上黎可以食晒甜品再飲例湯。不過隨住大家年紀漸長，戰鬥力下降，的確無橫掃千軍之力，而過年前十幾人共聚灣仔大榮華，雖然都係咁食，但，大不如前。

好彩有訂檯，原來近過年前灣仔大榮華果然好旺，而叫咁多咁多碟，大家都食得開心又快樂。好友聚頭，就是這樣。

由於我地採取你想食乜你就叫的策略，所以，不如睇睇呢張紀錄九成戰績既紀錄先：

燒鵝燒排骨，絕對無令人失望，燒得剛剛好，特別後者，蜜汁一流。

燒腩仔又係無理由唔叫，上檯仲熱，又脆口充滿咸香，前面果碟，蟲草花魚肚小棠菜，清清地係要架！

點解有兩窩雪菜火鴨絲湯麵？唔知呀，唔係我叫架！我主力食以下呢個：

美味棧頭抽豬油撈飯丫嘛！

我係一定唔會食既焗魚腸，細個食過一次，腥到我嘔，從此不相往還。

准山藕片與銀杏鮮竹，藕片真係超掂，夠薄，調味極佳！

老遠果碟生炒糯米飯又係精點所在，夠乾身料夠多，臘味絕對唔同你慳，好愛！

貼出黎主要俾大家知道，乜野係南乳花生炆豬尾。

豉汁蒸白鱔與蝦醬蒸肉根，後者係我至愛，前者其他朋友話好味喎。

名菜「圍頭五味雞」入味非常雞特別嫩滑，愛豉油雞朋友勿錯過。

客家煎釀豆腐，話咁快俾人食晒啦！

就算點飽都好，甜品出現時，又係另一回事：

當晚水晶包失準，奶黃唔夠甜，另一款聲稱香芋，但有點怪。馬拉糕繼續咁好食。

咁食法位位都係百七蚊，你話，大榮華真係好值得一大班人再去掃場架！