平有平滾

的確我是一個愛滾之人，唔滾唔舒服，但又不代表一定要滾得好貴，有時，街坊價一樣可以滾得好滋味。當然，我早已經將大家樂火鍋列入永久黑名單，難吃又唔抵食，湯底差到無朋友，食材雪到喪硬。

今次就介紹兩間最近我愛上既抵食小型邊爐，的確做到平靚正播！

首先係吉野家：唔駛擔心一定食牛，佢個海鮮窩可以配牛或者雞，湯底可以揀豆乳或者日式濃湯，不如先睇呢個基本食材先：

粟米墨魚餅兩塊，蟹柳兩條，帶子一粒，餃子兩隻，豆腐，豆卜，金菇，黃芽白，冬菇。係，以上全部有，真係一開波已經可以收大家樂皮。以上係日本濃湯，豆乳呢？如下：

不如睇睇雞同牛啦！

肯定無雪到硬晒，而且牛係有八塊，雞有八粒。雞仲要真係幾嫩滑架播！完未？未！

每個窩另配烏冬或者日本粉絲，量係分分鐘等於街邊食一碗烏冬或者麵仲要多。好，每個套餐連一杯中汽水，HK$59.90，若果好似我咁，加多幾條蟹柳（HK$9.50）（佢既單叫食材係好抵玩，抵過大家樂多多聲），總額超過HK$120，你果兩杯汽水，自動加大！湯，當然任添，仲真係分兩種，唔係是是但但俾清湯你加，咁有Heart，真係好喜歡囉！

好，其實出自美心集團既丼丼屋，冬季期間限定，都有火鍋播！牛肉壽喜鍋與及韓風辛辣豚肉鍋喇！

基本食材如圖，料新鮮，特別有日本年糕與及蒟蒻結，仲有蒟蒻麵線添！

有圖有真相，無論牛肉定係豚肉，的確係高水準，特別喜歡牛肉，真係好唔錯！套餐另外仲有一隻生雞蛋，一碗飯（好似可以添多碗）與及麵豉湯及醃菜。牛鍋HK$88，豚肉HK$78！

仲有一樣要推介，若果未飽，極極極之推介單叫烏冬，因為真係非一般行貨烏冬，而係該店高質稻庭烏冬！HK$20。

係咪好抵食先！好，最後，貼上兩張上上星期去銅鑼灣小肥羊任食火鍋既相片，當日食物質素與賣相係極極極高，後來先知，原來就死，嗚嗚。

好啦，以後港島區無寧記又無小肥羊，真係好很嬲！