半年前左右，有朋友吹雞話識人可以訂檯去皇仁同學會中菜部食飯，我淨係記得「佛跳牆」三個字，同埋，好難訂，要訂到半年後。我完全無概念呢間餐廳有幾勁，佛跳牆亦唔係好熟悉，總知有好西食，就去囉。
四月初終於去咗，成圍菜定晒菜單，我地被安排坐一間房。唔加一無收開瓶費，有專人招呼，有電視睇，呢Ｄ都唔重要，重要係，呢餐，真係好耐無食過咁精彩傳統中菜，你知啦，幾次移民潮，叻嘅中菜師傅，都去晒唐人街。
第一道菜：糖桂花棧美國桶蠔。美國桶蠔拍上生粉炸過，配上桂花糖汁，就係咁大隻，而且香甜鮮味，成晚嘅菜式我非常欣賞一樣野，調味剛剛好，與半身食材鮮味互配合，大廚功架，難怪每晚只做十檯客。
重頭戲喇，原隻鮑魚佛跳牆！睇片先啦！
呢一道名為翡翠鴿片花枝蚌仁，用菠蘿酸薑片與鴿肉片、花枝、貴妃蚌快炒，爽脆開胃，酸薑片自家製非常好食！
睇片是咪都覺得震撼？我地現場都覺得好癲，當一大窩煲住然後侍應姐姐慢慢逐樣分落碗，真係好痴線！
傳統的佛跳牆用料包含鮑參翅肚、花菇、瑤柱、雲腿、鮮雞、唐排、赤肉、菜膽與清燉雞湯，呢個，就無無海參，但已經鮮味到不得了，每樣材料齋食都好鮮味，最最最勁果隻大大大大大雲腿，大廚應該燉到好後期先放落去，所以，湯唔會過咸，而呢隻雲腿，好食到痴線！
柚皮生扣鵝掌，柚皮要煮得好食好考功夫，完全無苦澀味而且炆得入味軟淋剛好，鵝掌大大隻，絕對靚料。
椒鹽陳皮中蝦，大廚烹調此菜式，絕不油膩，而且蝦夠新鮮大隻，椒鹽味剛剛好又帶陳皮香，連蝦頭都好好食！
大海斑兩味之雲耳腿茸燕蒸斑球，嫩滑鮮甜，我呢Ｄ平時對蒸魚好一般都覺得正！
第二味，薑蔥煎焗頭腩，大家都飽飽地，但又無停手播，有圖為證，真係好手勢架！
脆皮炸子雞，大家話飽，但又繼續食，因為隻雞好好味，佢連鹽都唔駛俾你，又嫩又香口。
好喇好喇去到尾聲喇，生炒臘味糯米飯，足料到爆，仲用荷葉包住，荷香撲鼻！蝦籽雜菌伊麵，好乾身又有鑊氣，無人Skip架！
合桃露湯丸，咁肯定完全自家製啦，唔會死甜；西瓜又有乜好講呢？佢付上話梅粉你食，你話幾開心呢！
咁幾銀呢？我地飲左幾罐汽水，俾左兩百幾貼士，位位七百多離開，真係勁勁勁得呀！
沒有留言:
發佈留言