條女真係...Serrini《I'm Fine, thx. 演唱會》

究竟條女有幾紅？都唔好講搶飛搶到痴線（我搶唔到既），周邊無啦啦有我都唔知佢有聽條女既朋友s突然話有興趣睇佢買到飛預埋我（？），等巴士見到側邊果位少女睇ig都係睇mami，然後今次演唱會，嘩，唔好講少，一位無大唱片公司經理人公司既indie歌手，開演唱會竟然有Bvlgari贊助四百萬鑽飾，只係麥花臣咋播！當然啦，近年佢越拍越多雜誌越拍越高檔，已經知道市場上大家對於佢既受歡迎程度，係不能忽視（係呀但佢都係鍾意上得三四點收視果個電視台又唔係年輕人偶像）。

買唔到飛，又無朋友有飛，而KKBOX又無邀請我去（我要努力少少寫音樂先得），多謝KKBOX同KKLive仲有Mami將最後一場安排online直播，當然第一時間課金買飛，星期日晚仲有朋友上黎一齊睇！雖然（應該係因為我屋企網絡問題）有兩三首歌突然有D窒，但無礙興奮讚嘆欣賞整個「I'm fine, thx」演唱會，亦肯肯定相信，若果在現場，應該興奮到模糊，叫到拆晒天，你諗下，我睇完到今日，都仲喪Loop佢既歌，真係好痴線。更加要不得不佩服條女，演唱會前繼續好多好多曝光率繼續去唱繼續主持，典解可以貢勁架喂？

演唱會開場，Serrini化身希臘女神，戴上唔知幾貴既珠寶，在觀眾席中流動小舞台出現。改成big band jazz風格既日沒前完全變得不一樣。好多朋友睇完第一場都讀嘆佢點解唱歌好左咁多，亦有報導佢為演唱會有去學唱歌，但其實佢近年不斷唱唱唱，聽得出佢唱歌穩定左有氣左仲好堅（唔信去搵搵佢上志雲大師Youtube節目唱Amy Winehouse，真係堅得），所以接連將海妖、Drink 'N Dance與及Don't text him都改編成類似風格既big band jazz，耳目一新之餘佢真係唱得好好，Drink 'N Dance當然更炒熱氣氛，Don't text him成為向VVIP曬聖水，亦係有一種佢宣揚唔好再為唔愛你既人做垃圾屎既信念既一種儀式。

由和唱團唱出燎原之後，轉個頭，條女變身Diva！網絡安全隱患加上越夜越惹禍竟然有七個dancers一齊表演！係呀，條女跳得唔多但整個舞台演出非常有氣勢直迫跳唱diva級數，接住唱離原與及要做更壞的事，Gwendolyn系列呢四首完全有故事，感覺很安全要繼續惹禍同做更壞的事，還是選擇離開中原呢？呢部份好好睇，貪心少少，下次會唔會將淑芬故事搬上台？

天雷的確唱得好好，又動人，整個造型出場加埋唱，唔係講笑，有一剎那我諗起Adele！接住為《邪童謠》系列作序幕，日月無光既一句「說謊的人，不需要舌根」諗起呢個年頭所有牛鬼蛇神，「願悲傷不幸通通推動你前行，看呀！我們要收集散落四境，長存不滅的精神，慢慢說話 默默耕耘」再次獻給真香港人，個人演唱會，你接收到乜，佢想表達乜野，通通都不單止於眼前演出。

一連四首《邪童謠》medley又係另一高潮！又rock又爆加埋dancers，將亡國妖姬、艷后、灰黛與及小紅四個不同故事女主角向仇人報復放上舞台，自強反擊力量不斷提昇，妖女係無敵架，手起刀落，你死左都唔知咩事，最後與女dancers們共同發出邪惡魔性笑聲，夠晒完滿！

由於線上欣賞而KKLive非常貼心每首歌唱之前都話定你知，當知道竟然唱Children Song已經「嘩」再發現出場竟然係周爸爸就更「嘩嘩嘩」喂，幾耐無見周爸爸上舞台，而典解條女貢勁，搵到周爸爸做嘉賓？除左知道條女近排同高佬合作做歌之外，佢同周爸爸，又有乜關係呢？

周爸爸唔止出場唱一首，仲同Serrini合唱是你呀，啊！尾場原來是咁的，真係有今生無來世地精彩呀！兩位之後對話亦係一絕，周爸爸講典解黎做嘉賓，讚賞Serrini做音樂要自己爽左先，mami令佢重振雄風（！！！）與及女朋友邦邦要mami示範笠水，我地就等妖帝登基，兩人再次合作！

就算係麥花臣都可以做得好有heart，所以，Serrini再次係觀眾當中set左個垃圾堆化妝間，在工作人員扮幫佢化妝之下著得靚靚唱住將That's why you go away crossover既趣緻的響鈴，接住唱~旋轉with me*，再一次叫我地就算點都好，要靚，唔好再為左唔愛你既人做垃圾屎，自立自強都可以好開心！

再次上台，唱出新歌I'm fine, thx.與及我在流浮山滴眼水.jpg，然後叫在場在家信眾一齊擺動公仔齊齊Sparkling唱住Diamond Mine，演唱會，完住先！

就算明知有encore，演唱會製作識玩地出字幕唔駛呼籲全場跟住讀「唔該丫可唔摸以ENSORE」，氣氛從來無跌過！ mami再次出場，唱Let us go then you and I，不須多作介紹，現場字幕有歌詞，大家再次心照集氣。正能量之後都要有出氣位，忽eat all應該非常貼題，除左忽忽聲我地仲可以典？的確「快樂是忽eat all」，苦中作樂一下。與和音團合作唱出Accapella版既油尖旺金毛玲有心思有意思，最後所有成員上台唱出Pink Song，好正，好唔夠喉，但非常滿足。

整個演唱會除左精彩，歌曲編排有諗過，Rundown流暢而且高水平（喂你諗下，八個Dancers呀！二汶紅館都無呀），而最最最重要，玩咁多款音樂同造型，Serrini唱到，handle到，而繼續能夠同歌迷Connected，indie歌手玩成咁，厲害！

唔知之後mami會唔會上紅館，亦唔知佢越黎越紅典樣先可以買到飛，不過點都好，希望Serrini繼續堅持做自己爽左先既音樂態度，唔係迎合我地想聽乜，呢樣先最重要！

重有，唔該快快出碟，等好耐，一定要收錄所有Remixes！