我不斷被身邊朋友話我咁遲先攪，咁結果都攪到喇，不如寫一寫究竟我幾時攪，點樣攪，等幾耐之類，等一眾比我更遲或者等得太久很擔心的朋友有個心理準備啦！
首先，本人仍然有舊BNO，但已經過期N年。所以，到這個官網開始時，因為過期太久，據知要答的問題跟提供的文件比起無過期咁耐係多左既。另外呢，據知因為武肺原故，當局講到明非緊急服務暫停，所以閣下未有回音或者仲未郁手既，就要預左有排等喇。
好，坊間好多申請懶人包，所以點答問題亦有不同說法，我就對於答問題與提供文件方面回應一下我既做法：—
- 證件相：本人係叻到係屋企背住白牆自拍大頭相過關，我無出去搵人影。
- 父母與祖父母資料：我有填阿爸阿媽幾時出世同身份證號碼仲叫佢地講個「應該係」正確既結婚日期，但我無寄佢地結婚證書；祖父母幾時結婚之類我全部答唔知，喂，過左身喇好嘛
- 舊BNO要寄番去，特區果本要由頭到尾彩色影印一份（封面封底都要）正本唔駛寄，身份證正面背面彩色影印本，仲有出世紙正本。有人話佢寄出世紙副本，但我見坊間都話寄正本，咁，無所謂啦，佢實寄番俾我既。
- 住址證明：佢就話要政府機構先承認啦，我就將報稅表第二頁有地址同名果封寄俾佢；有朋友就話寄銀行月結單都無事，但有傻豬寄左用中文寫既文件去就俾人要求再提供，我明白依家要搵封正本信件好難，不過叫銀行出份月結單Hard copy應該簡單少少，應該無事卦，佢咁多件處理。
- 要搵人confirm your identity：本人有位識左幾十年同學仔住英國，咁自然交出佢個名同email address佢轉個頭就online confirmed啦！佢寫既要求都幾多既，我就唔清楚呢樣同坊間成日講既副簽一唔一樣，但又聽到有人話有BNO就可以幫人副簽，佢果度明明寫左，要長住英國架播。
好喇，交埋錢（九十幾英磅）就成功左第一步，你係會收到Email叫你好寄文件過去喇。本人呢就29/5經DHL寄既。當時個個都話用DHL，咁我公司附近鰂魚涌果間的確最少人排既，DHL係貴既，四百五十左右，咁服務係好既，你唔駛另外預備信封，佢有好硬淨既公文袋俾你，咁我將需要寄既野File裝好放入去俾完錢就閃，當然無再磅水買保險啦唔見左俾番錢你都無用。而我弟弟呢就遲我一日，佢就用Fedex，囉埋折扣平成半，服務無咁好喎佢話。我果份呢，就如期通知我2/6寄到喇，弟弟果份就遲一日啦。
若果閣下唔想排隊而且錢大把，當然可以預約速遞公司上黎處理收件啦。
留意番，英國俾武肺攪到市面好多服務都停頓中，份件收左並不等於真係收左——此話何解？我直到12/6先收到email：Documents received。然後15/6再入去track我個Application就已經話your application is being processed.
咁久不久又入去Track下啦都係無回音，但亦好好彩無收到email要求我補交文件，我相信當地都好多人仲要WFH，等，係預左既。直到20/7，我又收到email喇！話我知申請被批喇，佢話新passport印緊，得左就再話我知。
然後非常快地，22/7我又收到email話your passport is on its way！咁要留意番，passport會先寄俾你，文件會用另一份速遞寄俾你。於是我星期五就收到DHL短訊話下星期一派送，而我今朝終於收到喇！至於另一份，仲未收到。
我知好多朋友等得太久，又有朋友話佢依家聲稱唔駛補領只要有過都可以去英國移民云云，我就咁睇啦，你估日後囉住BNO世界通行D，定係你手上果本特區護照方便D呢？
祝大家好運啦！
沒有留言:
發佈留言