生日在台北：馬太郎燒肉

有朋友問我：去邊度搵咁多未去過既餐廳？我就一定無買書，只要在面書睇幾個Page（例如鄉民食堂），已經好多介紹，再自己消化一下是否值得一試就可以。不是次次都得，亦有中過伏，不過其實都可以睇得出，究竟果一篇係廣告，定係真心食評。

今次介紹位於中山區，從日本來台所開燒肉店馬太郎。據聞在日本係提供馬肉，不過台灣並不容許，不過店家提供肉類質素高，就算係吃到飽套餐，肉類質素非常可喜。

不如先介紹店家NTD699任食兩粒鐘套餐：

兩粒鐘，任食，包飲品。主要係豬牛雞加蔬菜，陣間再俾你地睇睇肉類有幾靚；另加NTD399可以飲一大堆酒精類，不過我建議唔需要，你想飲，單叫比較實際，你諗下兩粒鐘你飲到佢三四杯先回本。

  

真正炭烤，裝修闊落，抽風夠強勁，食完絕對唔會一身烤肉味。

  

無花無假，牛肉真係靚到不得了，你睇油花分佈都知。此等價錢吃到飽有如此質素牛肉實在好得。

戰斧豬排，厚切紐約客牛排，厚切伊比利黑豬，份量十吹，肉質高，絕無將貨就價。

 

自然豬培根，梅花，德國香腸，雞腿肉，無投訴。侍應仲會提醒不同肉類最佳烤法。除此以外，白飯／咖喱飯任添，蔬菜種類好多，我就最鍾意泡菜與及呢個洋蔥沙律：

吃到飽套餐另外可以以NTD195點呢個博多牛腸鍋，料多，但個人覺得味道淡，白麵豉不足。

 

另外單點呢個NTD420厚切牛舌！呢個一定要點！因為侍應幫你烤好，然後有十二粒，火喉剛好，如此厚切牛舌實在人間美味，不能不點啊！想知烤果陣係點可以睇呢度：

此店水準可喜，而且店員服務好，裝修又唔錯，基本上下次同朋友去台北真係值得一試，但一定要訂位，因為真係幾爆。想食好Ｄ，佢好似有A5和牛提供，價錢當然嘩嘩聲咁啦。