要搵一家大細都岩食既餐廳並不容易，特別係家中兩位小妹妹開始對食有要求：以前都話Pizza或者壽司再唔係屋企附近西餐廳佢地都好開心，最近佢地開始會話：「下又係ｘｘｘ。」之類。作為安排食既我，久不久都要去了解下有冇新選擇。
於是，去年八月，第一次光顧位於銅鑼灣既Meat King，該次都係同小朋友去，而發現價錢合理，大人細路都食得好開心，坐得舒舒服服，位置都算就腳。所以，上個月就同兩位姪女去，佢地都食得非常之咁高興。
首先要講講：位就最好訂，佢地有一半檯留俾walk in，不過訂左就穩陣。十二月去已經見到客人比八月多，而且都係一家大細出現。
此店網頁指餐廳來自日本，主打漢堡扒與其他扒類。通常都係鐵板上，加多少少錢有沙律湯甜品飲品自助餐，不如介紹下呢個先，因為，用料真係好唔錯：
沙律，所選蔬菜新鮮，最特別係醬汁多選擇，有非常日式既柚子胡椒，紫蘇與及胡麻醬汁，絕不行貨。
湯有兩款，我好鍾意日式野菜湯，好清甜；另一款好似係忌廉湯，兩個姪女就非常欣賞喇。
甜品好！好！食！無論最簡單既Jelly（味道好而且唔會過稀），奶凍，不同款蛋糕，蛋揵都絕對出色。若果甜品唔夠，仲有雪糕，另有碎糖啦糖漿朱古力漿俾你加，你話，小朋友點會唔喜歡先！
見到飲品陣容啦！除此以外，仲有Twinings茶包（有Earl Gray與及Lemon Ginger），熱朱古力沖包，汽水。啤酒紅酒另外俾錢叫啦。
食物又點呢？首先講講佢有兩款兒朋友餐，六歲樓下同十二歲樓下，我唔記得影相可以睇
呢度，而食完真係有一大盤玩具俾小朋友揀。大人呢？我有咁岩兩次都食左呢一款：溫泉蛋他他醬汁漢堡扒：
想睇下切落去有幾
澎湃可以睇呢度，另外配一款醬汁（有四款可選）好好食，份量非常吹夠，所以，第一告誡，唔好隨便將漢堡扒份量加大（Standard HK$148，Large HK$188，1 Pound HK$245）我第一次要左Large，飽到咩咁。加多HK$58就樓上所有自助餐都食得，好夠架喇，信我！
唔食牛又點呢？其實佢仲有雞豬同虎蝦，無須擔心；都仲唔岩你？仲有a la carte，有好多好多款前菜主食甜品，素食都有，我地之前點過黑松露忌廉薯條，與及喜出望外既鵝肝漢堡扒，都非常唔錯。
若果兩個人去，又怕點得太多，我會建議點個主菜加大塊扒再加沙律吧，另一位就九十九蚊淨食自助部份，已經非常夠食。
此店亦都適合朋友聚餐，有長檯可以坐六至八個人。食物唔錯，地點就腳，又唔算貴，我覺得呢間幾好，有興趣你地去試下。
沒有留言:
發佈留言