我的劇讀報告之太陽的後裔 / 營業部長吉良奈津子

我平日最喜歡就係一口氣煲劇，當然唔係日夜顛倒工都唔番果隻啦！若果好好睇，我通常會另寫一篇介紹，若果一般又有野想講呢？

所以不如咁，一篇寫兩套，大家又可以解答我唔明白既地方。睇戲呢，就算一部劇幾大受歡迎都好，其實你係絕對有理由唔鍾意，口味係一回事，而合唔合理又係一回事。

有關太陽的後裔，本人對宋慧喬有情意結，奈何佢拍既劇質數又真係好參差，通常都係雷聲大雨點小名過於實：那年冬天風在吹真係越睇越火滾，浪漫滿屋因為我真係唔得男主角所以唔鍾意，唯一好鍾意既他們的世界係叫好不叫座。太陽的後裔呢？我睇完絕對唔明有乜咁好睇。

我於前往澳洲出差來回睇左九集左右，感覺可以，節奏算快，而且靚人靚景，宋仲基果邊特種部隊打鬥場面迫真，宋慧喬果邊就似軍事版妙手仁心，有醫療人員心理描寫又有與軍人之間理念衝突。

咁，感情線還可以，男女主角果種我唔話你知我好愛你我又未諗掂其實好多劇（特別韓劇）都會有；而男女配角果條線，因為階級而不能相愛，老土但都算。

當你以為成件事有好多大陰謀，例如果位混血無國界醫生究竟會唔會有乜野戲做，果位大反派又會點點點，十一二集開始唔Make senses喇：宋慧喬可以咁順攤俾人呃左去做人質，然後男主角咁英勇諗住一條友去救佢，佢班兄弟又唔知點解可以知佢係邊加入拯救行動。

咁都算喇，大奸角果集死左，我心諗：仲有幾集，唔通仲有乜野戲做？

點知係無既，之後既就係拖拉感情戲，加一段夾硬加入去北韓間諜戲（真係好夾硬囉呢段）務求令劉時鎮受重傷嚇到姜醫生爆喊，然後傷未好又可以好突然地英勇偷出去點點點，與及搵戲黎做既兩位男角疑似殉國兩位女角傷心到不能，然後好耐好耐之後先發現佢地未死，之後就大團圓。

嘩我真係覺得自從奸角瓜左之後果幾集真係好垃圾，點解佢會收視高過來自星星的你架呢？點解咁多人話呢套劇好睇架呢？演員表現方面交足功課，宋慧喬一喊真係心都痛，宋仲基表現到位自然，男女配角形象鮮明討好，唔通因為咁而大家好喜愛？

不過講到失望，松嶋菜菜子最新日劇營業部長吉良奈津子我真係極極極不推介大家睇，因為，好爛好爛。我以為係菜菜子講職場女性面對家庭與事業應該好好睇啦，以為日劇十集左右唔會點出事啦，點知，唉。

女主角係廣告界創作天后獲獎無數，性格目中無人，不過因為嫁人生仔放了三年假，重返公司竟然被調往營業開發部而不是其最拿手的部門，而且仲要佢短期內交出業績否則成個部門收皮。劇集設定通常都係咁啦，下屬一係廢一係無心戀戰，咁先有戲做嘛。

家庭呢？因為餐餐接唔到仔去唔到仔學校活動都要老公頂，老公開始有怨言，女角以為搵到個好可靠既褓母，點知原來呢位褓母又好似另有企圖，而同時奶奶對其只顧工作不顧家庭非常不滿。

先講家庭：攪到懶懸疑，以為個褓母有乜陰謀有乜鬱辱，點知純粹唔抵得，所以要破壞，但愛上左人地個老公——呢位廢柴軟弱老公角色設定又係唔討好，差少少攪埋的確係預左會發生既劇情，咁奶奶當然早就睇通叫菜菜子小心啦。

職場方面，飾演以前下屬依家上左位成為創作總監既松田龍平成套劇一直木口木面，我必須承認一直對佢無乜好感，其實成套劇佢無乜戲份可言，唯一問題就係佢其實係咪愛上呢個已婚前輩；其他部份一個一個單元搵新生意次次都失望而回不過又好似喚回下屬對工作之熱誠，但你又要整多條線講公司有乜野不可告人秘密，又有個無間道成為女角下屬，講到懶有事。

點知，最後兩集既發展真係把鬼到不得了，我完全唔明白點解個二五仔會開口講女角知發生乜事，又唔明點解果位大大上司其實本身派菜菜子去果組係想點，最後接成大生意之前菜菜子於Board meeting當中獨腳戲實在令人Ｏ咀地無謂，總之睇到尾，我既反應係：無ｘ野下話！

家庭線呢？去到尾咪是是但但和好呀大家互相明白大家希望重新開始咁囉，仲有小三褓母出黎良心發現話菜菜子知其實你老公無咩到我架你唔好嬲佢啦，你想唔想死？

所有角色都盡力演，不過劇本如此垃圾，真係神仙難救。我未試過睇一套新日劇會睇到訓著。