好葡lunch:Casa Lisboa

蘭桂坊酒店樓下有好幾間餐廳，包括去年食過西班牙周六Brunch Buffet既Boqueria，非常豪裝個Feel好好但食物如何印象無印既Lily & Bloom，與及原來已經摺左既Gold by Harlan Goldstein好唔錯既Lunch Buffet。曾經去過Boqueria食Half Buffet，非常強差人意，反而葡萄牙菜既Casa Lisboa，從第一日發現已經去過兩三次。

餐廳分別有三道菜與及四道菜既Lunch，價錢為HK$190及HK$260，兩個選擇都有Complimentary Snacks，隨便於餐牌選一款湯或沙律，一款主菜，與及一款甜品。四道菜就可以自選頭盤，兩款套餐都有咖啡茶。點解介紹？因為實在大件抵食好食。

不如先講講麵包：麵包係熱辣辣，配上牛油與及另一款醬，送湯，一流：

頭盤選擇如下：

唔好睇價錢，佢真係餐牌有乜你都點得，咁我試過乜？

炸馬介休球，三大粒，足料，味道正宗！呢個頭盤份量的確唔細！

白酒蒜蓉香草炒蜆，無花假，你睇蜆係如此大隻，鮮甜無比，加上牛油蒜蓉汁真係好不得了！

蒜蓉八爪魚，太原味，未必人人喜歡。

湯與沙律選擇亦好多，我試過湯，亦都試過沙律。

這個是葡國腸薯蓉湯，原汁原味好夠料。

海鮮湯呀，餐牌至貴果個，你可以飲得出真係香濃鮮味！

呢個吞拿魚沙律，好飽，味道唔錯，但不特別。

主菜，以上任你選呀真係！

呢個，食過兩次，都係讚不絕口：豬柳炒蜆！好香口，但激推原因係，豬柳嫩滑入味到你唔信！

海鮮雜燴，唔駛點介紹，入面有幾多款海鮮你地都見，而且唔會過份調味，依然食到鮮甜！

以上每碟係跟白飯的。

葡式烤乳豬，當然唔會好多件，但好嫩滑惹味。

呢個係欖油馬介休，比較膩。

基本上甜品，真係好唔錯！

砵酒煮梨！

葡式軟蛋餅，唔太甜，好推介！

香橙焦糖布甸，呢個又係唔係普通甜品，可以一試！

好喇，介紹到呢度，連加一三舊水一個午餐，肯定貴，不過，你見啦，大件夾抵食，有時對自己好少少，呢處係一個好選擇！記得訂位！