好食抵食泰午餐：Moon Thai

仍於上環工作時，附近工作的朋友帶我去Holiday Inn Express Soho內的泰菜餐廳Moon Thai吃午飯。未入去見到車呔人，仲要身處酒店，以為價錢肯定非常唔親民，點知，唔係播！

午市半自助餐，價錢不貴，而且高質素又好食，仲坐得幾舒服，我離開舊公司都請同事到此開飯，兩名非常愛吃泰菜的同事都表示很讚，我想，這亦算是business lunch不錯的選擇。


不如先睇睇午餐餐牌，方便我繼續介紹：

睇到啦，選擇非常多，若果兩名女士食量不大呢，絕對可以一個點有主菜另一個只食自助餐，點解呢？自助餐好多野食架！

湯有兩款，以上當然冬蔭功，不算辣，而且味道不錯；另一款是椰汁雞湯，即係唔辣，係咪好唔錯？

自助餐，有炸魚餅，春卷，好幾款沙律：海鮮粉絲沙律，泰式炸蛋沙律，亦有西式沙律；有泰式辣肉碎配生菜，仲有泰式鳳爪播！

午餐有咖喱選擇係咪？朋友食過幾次，表示好幾種咖喱都好好食，上次佢點我都有試，好唔錯，你地見啦，自助餐仲提供白飯同印度薄餅，係咪好飽呢！

自助餐仲有甜品糖水，我可以話你知，次次我都無食－－因為太飽。

睇下我兩次食既主菜：

呢個泰式豬手，上檯有少少失望：咁少既？點知一試，嘩，少食多滋味，因為豬手煮得極淋身入味，醬汁微微帶甜，肥瘦適中，送飯一流，好食到飛起！

鮮蝦炒金邊粉，整到咁靚已經眼前一亮啦！唔止得外表，真係好食，而且唔油膩，三隻大蝦球鮮甜彈牙，果然係車呔人無選錯。

基本上兩次去都坐唔滿，不過你明啦，點都係訂位先食有著數囉！