點心靚：周記茶餐廳

由於地鐵迫近，西區除左樓越來越貴，餐廳越來越豪，亦多左不同餐廳出現。老老實實，住附近唔一定會試過，有部份餐廳價錢，實在同我食開既有一段距離。

近來發現水街有一間叫周記點心茶餐廳，某周日與朋友食late lunch，行過，見賣點心，兩個人可以叫點心食又幾唔錯，於是幫襯，感覺非常良好。


實在不太清楚此店來頭，但佢唔做夜市，而主力賣點心，價錢亦係分大中小點果隻，合理街坊價錢。

星期日下午三點幾，坐爆咁滯，好旺場，而且腸粉無晒，唔記得邊樣又賣晒咁，下次要黎試下早茶！

梅菜肉餅蒸飯，好舊式酒樓feel，食落原汁原味無味精，肉餅有料到有咬口，好有好感！

呢個綿花雞like爆！有相你睇，樣樣都四四正正，雞滑有鮮雞味，魚肚爽口入味，無得頂呀！

鮮蝦春卷，即叫即炸，脆口唔在講，你見啦，入面真係好多蝦膠，真係蝦膠唔係講笑！點一點沙律醬，正呀！不過更正既，係呢個：

懷舊蝦多士！首先都係即叫即製，滿滿芝麻非常香口，而且煎得香而唔油膩，內層蝦膠一樣出色，剛剛好，成件事好滿足呀！

四個點心，有茶你飲唔收茶錢，九十幾蚊，食得好開心好有質素！下次要早少少叫埋屋企人去食先！