這叫極限中菜：Bo Innovation

的而且確，飲食口味是很個人的：你覺得好食，我覺得好難食；你覺得好值，我覺得有人請都未必食。口味是這樣，那麼，早幾年興起的份子料理呢？睇介紹睇得多，你話食咩？未試過。不過知道此等東西，為玩而玩，簡單來講，搵黎攪，仲要因為你貪得意搵黎攪，我去食就係俾錢你玩然後我要識欣賞，不過價錢高人一等播。

話說最近有一洋人的工作夥伴請我與同事吃午飯，他一提議這間叫Bo Innovation，我聽都未聽過，即管上網望望。嗯，X-treme Chinese Cuisine，睇完相，相信，應該係一個全新體驗，預左唔飽。

不如先睇睇，呢個擺設有幾高尚先：

嗯，中間圓型果塊係雲石，堅係高貴。

好，呢粒並唔係普通既蝦餃，根據其餐牌介紹，係加左黑松露XO醬，咁食落又係點呢？首先，唔夠熱，皮唔夠薄，蝦可以啦，面頭果舊黑松露XO醬，即咁，我知黑松露乜味架，我入口咬咁耐，我只覺得好咸囉，之後仲極度懷疑，呢度菜，有味精！

呢粒叫炸墨魚丸配泰國青檸汁。呢粒墨丸做得唔錯，彈牙足料，當然唔會咬到墨魚粒，但係好食既；至於個醬，青檸味偏淡，整體可以。

呢個春卷並唔係普通既春卷，而係包住冬筍與雞肉，好清新，味道調得剛剛好，春卷夠脆！好食！

哈，呢個上檯時，侍應先為你淋上Extra Virgin Olive Oil，咁呢粒係乜黎架呢？銀雪魚龍葵球，我與同事事後異口同聲認為，此舊野，味道怪怪，而且亦係另一有味精既Suspect。點解我肯定呢餐有味精？我對味精好敏感，所以呃我唔到的！

無食過相信都唔知呢個主菜係乜，英文係咁既：Slow cooked, Suckling Pig, Chinese Vinegar, Egg。侍應係咁介紹我聽：乳豬手撕成絲再用豬皮包番成一個球然後用八珍甜醋去慢煮，果粒係糖心蛋。好喇，我只有刀叉去食，一邊食我真係有好強烈「多舊魚」既感覺；呢個豬肉波，肉唔嫩，八珍甜醋係好香，不過唔夾囉！無人叫我將隻蛋撈黎食，我用叉高難度整起隻蛋黎食，不外如是囉！

Menu話呢個餐包Starch同甜品，嗯，應該知道以上食品肯定唔飽，於是整碗蟹籽甜椒炒飯過你頂肚。太肚餓喇，實好食架！

收晒所有野，上甜品之前放呢個懶有型既上黎，嗯，見唔見到「廚魔」兩個字？佢都有係廚房出現架，好很榮幸囉！

甜品應該係呢餐最好架喇：杏仁雪糕好香好滑，充滿濃濃杏仁香；macaroon就硬左少少，不過整體唔錯，又靚啦咁。

以上，一個餐，HK$288加一，唔知一邊食一邊斟果支好很貴礦泉水幾錢，不過都係果句，呢個價錢，我真係可以食好好多，而唔係攪成咁囉。