不會再去Monster Sushi

Monster Sushi，除左知道係吳彥祖開之外，就只知唔知點解好多人等位。不過，一直未食過－－最接近果次應該係兩三年前，晏晝三點去到，明明大把位，硬係要我坐Bar檯（當時兩位）唔俾我坐四人檯，唔高興無幫襯。

上星期終於第一次食，iSquare分店，六點幾入座，食完的結論係，又貴，又怪，又唔好食。

佢叫哥斯拉卷，話係推介，其實上檯時我懷疑佢有冇俾錯野我地。呢件野，凍，硬，難食。係好想講粗口。

前面果兩件叫酸辣八爪魚軍艦，好怪，真係酸辣，但成件事好唔夾。後面係三文魚籽，無事，可以既。

呢個真係離ｘ晒大譜！鰻魚牛油果卷，你有眼見，包到咁死樣都可以上檯！仲衰過明ｘ壽司既級數！凍冰冰，好難食！

呢個叫黃金卷，算係Fusion得好好食既選擇，芒果配搭得宜，可以一試。

另一道係絕對可以既清酒煮蜆，清酒味夠，蜆肉多而鮮甜。

呢個豬骨湯叉燒拉麵係水準以上，當然唔好同專食拉麵既舖頭相比，但係唔錯既。

松葉蟹膏玉子燒，普普通通，交到功課之作。

好，壓軸出場，兩道極之爆粗食品：

蒜香厚燒牛舌，痴線，甜既？！我完全唔Ｘ知佢地點調味，係厚呀，都鬆化，但真係難食，旁邊配菜好食得多！

最後呢道，寫到明係『吳彥祖推介』

全名叫「帆立具刁草柑橘汁刺身」，食落去，都唔知想點，酸啦，尷尷尬尬，可算係一道極之失敗既Fusion菜。

食左咁多，要成四舊水，送番張一舊水Coupon俾你下次用。我呢，就唔會再去架喇！

吳彥祖，你呃人！