很久沒聚在蓮香樓

我都不知寫過幾次蓮香樓，是中環威靈頓街的老店蓮香樓，很喜歡跟一大班朋友去，可以吃很多，可以試很多地道的菜式。的確又有好一段時間沒有去過，適逢有中學同學多年沒回港，然後一呼百應十多名同學有空一起吃飯，於是想來想去就提議去蓮香樓，那位同學表示，上次（好幾年前）回來也在蓮香樓吃過。

晚市吃蓮香樓有些地方要注意的：有些東西是要預訂的（例如冬瓜盎八寶鴨，馬拉糕，西米焗布甸），人家是不收加一的（所以要醒目自己俾貼士），然後就可以一班人開開心心食番餐！

當晚係盡興而歸既，不過估都估唔到：

 

滿心歡喜賣相又正既冬瓜盅竟然有酸味！當然立即換走啦！

 

燒腩仔好食，鹵水豬肚更好食，好食到最後再Encore！

八寶鴨，坦白講幾年前仲好食，不過依家都唔錯！

陳皮牛肉餅係必點既，最好就送白飯！

 

我地就叫左福建炒飯與及揚州炒飯，無得彈架，特別係揚州炒飯！

 

無冬瓜盅，我地另點海皇魚肚羹囉，冬瓜盅下次都會再食！

  

炸蟹鉗我地都訂定先既，太好食，鬼咁大粒，有人要Encore咁我地就成全佢啦！

霸王雞都係訂既，好開心有海蜇跟，雞本身好夠味唔駛蔥油加料！

  

西檸雞，椒鹽鮮魷與椒鹽鱔，喂無得輸架播，特別係鮮魷！

 

魚香茄子煲與琵琶豆腐，樣樣都好食，冬瓜盅既失望又唔記得左囉。

 

有菜既有菜既！蒜蓉芥菜膽與及蝦醬鮮魷炒通菜！

到最後喇，引來其他食客走黎影相既有以下兩樣：

 

首先係個枕頭咁大既馬拉糕！一出現隔離班阿姨走黎問可唔可以影相！我地每人又食仲有同學可以打包一件番屋企，大滿足！

西米焗布甸，保持水準，童年回憶番晒黎！

好，以上咁多，加埋好多好多好多支啤酒，十一個人都唔駛三千八，係非常之抵食而且又開心，趁蓮香樓未被業主迫走，食得就好食喇！