生日在台北：Citizen M住後報告

大家好！過去幾天小弟飛左去台北過生日，應該係咁大個人第一次外地過生日！雖然出發前幾日右腳受傷，全程行動緩慢兼且去少好多地方（你知啦我去旅行通常四圍行），因航又無因為我生日而upgrade我，不過今次的確幾開心，因為在地朋友同事們對我好好好好，四十幾歲人都算係咁喇。

首先想介紹就係今次第一次住，非常新既酒店Citizen M！位於北門廣場附近，台北車站與西門町之間，去年九月行經見到呢間酒店已經有印象想去了解一下，於是今次失驚無神去台北換好機票之時亦了解呢間酒店，住呢個五六日每晚七百港紙左右，決定拍板去馬！



Citizen M乃荷蘭酒店集團經營，無記錯亞洲區第一間就係台北。酒店有廿六層而每間房間格價錢係一樣既，外觀呢，就咁：

好喇，星期五Check In，得到四樓既房，失望啦！明明想要住高，咁都要睇睇間房既。有一樣要讚就係check in與check out可以自己攪（除左酒店職員check in要記低你護照入台證之外），的確係幾方便。入到房，哦？就算係四樓，望出去都算開揚！

  

  

 

房間不算大，不過簡潔舒服，特別張床好訓過好多酒店，而且望出去開揚，你唔想咁揚都可以落簾或者Blind。另外，所有燈光冷氣窗簾電視都可以用iPad控制，仲可以將手機連接電視，你想睇乜都可以用電視睇。

不過，酒店提供電視台數目較少，比起好多台北酒店都少，美中不足之一。

另外一個無咁好既地方就係：就算你有朋友探你，樓下同Ambassador講完，佢打俾你確認左，酒店係唔會放佢上黎（因為要Keycard先可以到某樓層），酒店Ambassador話佢地無卡直達所有樓層，一定要我落黎接朋友。

仲有就係酒店無當地在地直線電話（即係02字頭），咁我訂肉乾果間一定要我填就攪唔掂喇，不過酒店Ambassador好好，立即幫我打去訂好晒。

第一晚回酒店，問問佢地點樣可以住高ｄ。佢地話其實係根據當時check in有乜房隨機安排，咁我五六日就自然難住得高。傾傾下講到我生日啦，佢地就立即送多杯drink俾我（每個住客入住都有一杯即係我有兩杯），仲成班人唱生日歌（真係紅都面晒），番到房仲有張即畫既生日卡添！咁順道又介紹二樓成層既吧與及公共空間喇：

  

有得上網有得坐有得hae仲可以叫酒飲，佢仲有可以買即食麵即淥俾你加料都得。我飲左兩杯：一杯係汽泡油特調，一杯係白酒特調。

 

最後一晚，酒店真係幫我換房！咁就由四樓搬到上十樓喇！房間間格一樣，不如望下個view：

我諗，住再高的話，望住真係可以唔願出酒店房。

此酒店若果一人遊啦出差啦情侶啦都非常適合，若果家庭就唔太配合喇。從酒店行去西門町八分鐘，行去台北車站亦一樣，機場捷運一出行幾分鐘亦可到達酒店，門外就係北門廣場喇，而最近捷運站就係北門。

有興趣，不妨下次考慮一下。