上海好好食：蟹尊苑

竟然要依家先寫實在唔好意思（今年最後一個scheduled biz trip剛完結），不過，總是值得寫一寫。

話說所有朋友知我去上海都話：「記住食多Ｄ大閘蟹」，實情是，本人是非常懶在飯桌上動手剝蝦拆蟹，老爸在家整白灼蝦我都會動手的，與客吃飯也會，但有得揀我是絕對不會讓自己那麼狼狽與污糟，於是，有同事介紹了蟹尊苑給我——一家會幫你將蟹肉蟹膏蟹粉拆好的餐廳。

我去的是靜安區附近的店，司機將我載到的地方原來是餐廳另一邊，直上二樓是高貴的用餐區，而他們知我一條友就帶我落一樓——可能果日著得隨便。

店對外就有玻璃俾你睇住，呢幾位師傅不斷係度拆蟹，唔知佢地內心係咪都不斷炒蝦拆蟹，因為都幾辛苦：

 

呢間舖好受歡迎架！我十一點幾到達就坐定定，然後外面已經不斷有人排隊，不過，絕不便宜，而且非常吹漲，不收外來信用卡（我呢Ｄ死港燦唔用豬腐寶咪煩囉）。

坐定定到有得食係要時間，睇怕佢亦想話你知，即刻拆既，保證新鮮：

我就叫左呢個，你睇，幾幾幾多蟹膏蟹黃，真係懶人佳音澎湃到不得了架！

 

呢個湯都唔少野，好濃蟹味，當然，重點都係咁撈麵啦，呢個餐，三百八十八元人仔！你又咪以為最貴，後來店家問介唔介意另一客人一齊坐，我話無所謂，然後坐我對面呢位阿姐，一人前，食左呢個：

蟹膏蟹黃蟹腳蟹肉仲有唔知乜，每樣一盤，據聞飯麵可以任添，人仔六八八啦。呢位阿姐就一人前隊左呢個，豪氣非常。

各位蟹粉們，去開上海，搵搵呢間，真係好滿足架！