好鍾意食大排檔小炒

香港市道唔好，但一樣有舖頭要排隊食或者晚市做兩輪。通常分左三類：一類就得到小Ｘ書加持嘅打卡餐廳，好唔好食，見人見智；另一類就老牌出名唔貴嘅，例如前排去完食得返一間嘅泉章居（但真心唔多好食）；仲有一款，堅好食，堅好多人去。

認識大排檔小炒係多得同學帶去食，基本上次次都真心覺得好味，就算佢唔記得左幾多錢以下只收現金唔收卡，就算要限時限刻（除非你包間房，其實又唔係好貴），都食得好開心。最近去過兩次，第二次同幾個同學去一行七人，可以叫多幾味，而我地揀左食六點到八點。

不如先介紹幾味我認為必食嘅先：

金牌臘味煲仔飯，唔駛另加豉油，影完相佢地幫你撈好食得，香味撲鼻多料又香口，轉個頭就俾大家消滅喇！

懷舊炸大腸：最近老豆去泉章居食完係咁話難食，要快Ｄ帶佢黎呢度，呢個實在係，忘記任何食左唔健康嘅擔憂，食左先啦Ｘ！

上一次去呢，八點Sharp要交檯，咁就將食唔晒嘅炸大腸同煲仔飯帶返屋企，第二日叮熱黎食，痴線，好食到叫救命。

呢個本人真心推介必點：黃金鮮魷，咸蛋黃醬滿滿包住每條鮮魷，真係香口到你停唔到手。

最近嘅新歡，鹽焗東風螺！用上岩鹽粒黎焗，上檯每粒都好很熱，螺肉勾出發現，咸香微微鮮甜到絕，乜都唔駛點，極正！

都有清淡之選架播！蒜蓉炒菜芯我班同學大讚好好食，而呢個咸蛋肉餅，醃肉同蒸既時間都剛剛好，送飯一流！

水煮牛同酸菜魚，份量十足，辣度平易近人但好惹味，無論牛肉同魚都好滑，仲有其他配料例如蓮藕片，芽菜，木耳之類，非常好味。

脆皮牛腩！係同學當晚第二輪叫然後繼續食不停口，因為牛腩肥瘦適中，炸完繼續入口即化，有濃濃牛味，脆皮麵衣薄而香，真係師父有料到！

呢個七十蚊一隻嘅蒜蓉粉絲蒸蟶子皇，係我澳洲個細佬次次黎都要食，佢話好鮮甜！

呢度豉油皇炒麵又係好得，乾身唔油膩，香口到不得了。最後梗係一定要同戰鬥碗良朋共聚啤啤佢啦！

留意番，我幾次都係去駱克道店，記得訂檯！