有趣的都市喜劇：Food Buddies

話說Ｎ年前我曾經被邀寫電台都市喜劇Sitcom廣播劇本，那時的師父是這樣告訴我的：Sitcom不易寫，你每集要有主題，要有Punchline，要爽快過癮。所以，製作Sitcom電視劇更不容易，寫性愛的更難：放在免費電視台播，講到唔湯唔水未必好睇，如何點到即止又要抵死過癮非常難拿捏。

最近睇過去年ViuTV播放而非Makerville製作的《Food Buddies》，寫的正是這個年代的性喜劇，而且用食物來將各條主線與主角連在一起，十五集交出一個很不錯的成品，在本地製作來說是平衡得宜而且各主要演員演出是夠放夠自然。

劇集主要源於大受流行的交友軟體Dine Me，略略提到大數據如何將不同的人連上。首先要讚就是，好怕劇集講科技嘢，但講多兩講錯漏百出，今次呢套就好清楚時下用交友軟體識人點玩法，呢樣已經係令觀眾會投入嘅重點。

六大角色性格鮮明貼地：阿德（吳肇軒）乃IT狗一名，並唔係無拍拖經驗只係比較弱（佢提過佢試過LTR但唔Work）；Asha（蘇皓兒）加拿大大學研究生，因為一直係乖乖女所以對於性愛有極高探索興趣；Jan（談善言）小學教師、素食者、Bi，Pansexual；BJ（柯煒林），攝影師，熱愛NTR（即對別人擁有的極有興趣）；Kelly（衛詩雅）人事部高層，原本與初戀結婚十多年但發現丈夫出軌而重投人肉市場；Man（唐浩然）茶餐廳太子爺，A0，有社恐，網絡世界是極受歡迎虛擬網紅。

劇集有趣就係用三個單元，將六個人連上：第一個就係阿德竟然經App認識Asha與Jan繼而發展共同協議多角戀，劇情話題相信香港電視極少亦不敢觸及，三人對白抵死亦不會避忌，劇情涉及性或者性辟亦不會忌諱，同時唔係用男／女演員性感演出做賣點（係，我知柯煒林成日唔著衫，但其他演員真係無乜性感演出）。呢一個單元除左無啦啦幻想拯救世界果一兩幕有D Kam，整體係幾好睇。

第二個單元係我最喜歡：由Kelly發現老公阿強（白只）原來婚後有好多好多性伴堅決離婚，一直以為自己是幸福少婦無其他戀愛經驗的她，在app識到BJ，而原來兩人曾經認識，一直只係玩完就閃從不相信長久關係的BJ成了Kelly玩App的軍師，然後發現Kelly常去的茶餐廳太子爺Man跟Kelly配對成功（嗱不得不提阿Man老豆用佢張相四圍flirt人，呢個角色又貼地又抵死），於是Kelly一心希望幫Man克服社恐，而她跟BJ真係撻著，不過一直希望有穩定關係嘅Kelly又點樣同唔信愛情嘅BJ改變呢？

最後一個單元，係頭兩個單元大魔王，Jan遇上BJ，然後慢慢揭露Jan因為前女友Belle（伍詠詩）的離去與及成長陰影受心理創傷，原本Jan同BJ兩人無論想法與性格轍，但BJ發現自己真的愛上Jan，更希望與Jan組織家庭。BJ如何令Jan走出過去陰影呢？

劇集另一重要元素：食物，不斷出現打邊爐，從而帶出不同角色不同喜好。在拍攝食物方面，特別靚特別吸引。

至於安排葛民輝為阿德隻狗配音，阮小儀溫超為Kelly兩條金魚，局部好笑，後者玩得幾過癮。

幾位演員表現係亮眼：談善言與柯煒林最有火花，兩人亦非常放，挑逗戲談情戲都絕對交到貨；衛詩雅基本演出一個港女性格的離婚人妻，有時HR上身，但都忠於自己想要，演得好唔錯；蘇皓兒嘅放同玩味係讓人眼前一亮，將Asha的性格矛盾演到，與阿德之間從頭到尾的相處亦好看；唐浩然將社恐A0情痴演活，與柯煒林對手戲好笑好玩；吳肇軒整體過癮，認真感情戲略為用力。

此劇由無記創作多部新穎劇集的編監合作，我沒有看無記劇太久所以不能評價，但作為黃Viu公司製作的劇集，此劇不單面向香港，更可以讓亞洲其他地區觀眾欣賞。