新手貓爸爸

有睇開我面書朋友都應該知我當了貓爸爸，終於，終於都當了！其實一直都想養貓，我很愛貓的姪女姪子們一直都問：「伯伯你幾時養？」「伯伯你究竟係咪養？」。然後故事要說到去年十一月，我住附近的朋友要去十天旅行，他們有三隻貓，竟然問我：「你可唔可以幫手黎十日，夜晚鏟貓砂盤同埋開罐佢地食？」 我只係佢地出發前上過去一次，知道程序，就答應了。

其實他們的家在唐樓六樓，每次上去要行百二有多樓梯，若果當晚練完腳就更甘。但呢十日，我完全被他家三隻貓收復：東方短毛的Cleo是最親人的，第一次見我已經好似識好耐；黃貓Charlie過兩日開始任摸仲自動跳上黎求抱；黑白貓Bosley比較宅，直至有日日間無上去，佢餓先俾我摸佢。呢十日，我亦經歷要清理痾到周圍係嘅場面，無事，好開心，有時仲會留低成粒鐘，無所事事，淨係睇佢地玩。

就這樣，我決定要養，目標是領養黃色幼貓，明顯啦，Charlie最得我歡心。於是，研究屋企有乜要處理，同時間亦向身邊朋友了解有什麼領養貓貓的渠道。在這半年有多，我有認識附近的貓義工，也有見過一些貓貓。有些是不合眼緣，有些是我想養過一陣子有人先要了，又有些後來才跟我說：「義工想一對領養。」我明白的，我一直希望養一隻，怕自己未必能夠應付，雖然，朋友們都跟我說：「一隻同兩隻唔差幾遠，佢地有個伴仲好，你唔駛中途想養第二隻仲難。」

期間，亦經歷過朋友的貓貓急病離世，我知若果發生在我身上，我肯定傷心，我知道的，但我決定了，不會因此而害怕。

說到貓義工，我應該都算好運，沒有遇過那些基本上好似想piss off你養貓的：「你一個人住邊個陪佢？」「你有冇諗你死左點算？」「你兩公婆離婚點算？」我遇上的都非常友善，解答我很多問題。我也曾經到SPCA，他們有將希望人領養的動物放上網，然後你可以到相關中心看貓，若果決定領養他們會安排家訪，基本要求一定要裝貓砂窗，然後好似要俾返少少錢佢地。

直至今年六月初，住元朗的舊同事又找我（係呀，原本佢問過我有隻要唔要，我諗左幾日，到話要佢同佢老公決定自己養埋），她認識的貓義工救了兩隻貓貓，問我有無興趣領養。當時睇一張相同一段片，兩隻濕晒好細隻，唔知點解我睇完，隔兩個鐘，鼓起勇氣就決定要養。由於我六月底要飛，所以跟貓義工傾過，我七月頭先接佢地，而貓義工呢段時間就照顧佢地：幫佢地沖涼啦去蝨啦醫好感冒啦教佢地去貓砂盤之類之類，我就久不久收到佢地嘅片同相，六月中亦有第一次去見過佢地。

其實由決定養之後，緊張，擔心，試過瞓唔著。因為我唔知攪唔攪得掂。

義工姨姨好好人，教曉我很多東西，也幫我買了籠呀之類的東西，提醒我要買要注意的事情。七月六日，姪女跟我到元朗，接了他們回家，然後住附近的朋友們來幫我看看有什麼要打點，於是Muffin與Mango，一仔一女，正式入住。

毫無經驗的我，不斷被義工呀朋友呀提醒，貓B要教，最緊要夠惡話佢地，你咪太好人呀！（然後我接走當日貓義工話：「睇你個樣都係慈父。」）眾所周知，我屋企最多就係CD，所以，當我慢慢放佢地出黎自由活動，喝得最多就係佢地咬同抓CD，不過呢兩隻小朋友都識驚，喝多兩喝，知我唔高興，都會停手。而且，佢地都會俾我抱俾我摸，要捉返佢地入籠，都好順利。

除左姪女，爸媽都探過佢地喇，佢地由開頭話：「嘩你搵黎攪播。」到後來問：「你今日有冇WFH？可唔可以上黎睇佢地？」我就知道，兩位小朋友得到爺爺麻麻喜歡喇。

其他朋友亦有探過，當然，對於陌生人佢地會怕ＤＤ，但見多陌生人，佢地就無咁驚青。

我慢慢將佢地活動範圍加大，基本上我係屋企都由佢地出廳玩。佢地或者知道開餐之前我留廚房最耐，所以久不久就跳上爐頭與及放其他野位置。起初我會叫返佢地落黎， 然後我諗，不如俾佢地探索，知道無野玩自然唔會上去。咦，又真係Work播，佢地發現無著數，依家少左走上去。

早幾日兩位小朋友突然唔食野，我擔心到不得了，後來問左朋友同義工，睇怕之前食滯左，叫我唔駛驚，餓下就無事。但果兩日我真係驚過乜，直到佢地慢慢食返，知道餵食真係要適量，同埋有朋友話：「你依家知做人老豆老母果種心情啦！」我知啦，我幫個仔剪爪，我朋友睇住話：「你個樣仲驚過佢！」

之後仲有要絕育啦（因為一男一女，我唔想做爺爺），再慢慢由佢地自由活動啦，基本上呢個月係好開心，亦適應有佢地嘅生活，而兩位亦適應得好好：

我會久不久係面書分享一下佢地近況架喇。