吃在胡志明

有少少對唔住大家，因為忙，少寫好多，好多想寫，忙到唔記得點落筆。咁若果要快靚正有貨出而又滿足到大家，應該係寫食。

最近公幹到新加坡及越南，其實今次新加坡都有好野介紹，多得同事帶我食未食過嘅。不過，又好似寫越南胡志明市開心少少。雖然，時間緊迫，亦無乜預備搵有乜餐廳好食。下塌Park Hyatt，一間好正性價比極高嘅酒店，而酒店同事非常幫忙，第一晚自己出去搵食，想食河粉，佢地就介紹一間本地人會去嘅，因為我話俾遊客果ｄ，唔駛架喇。

餐廳叫PHO Thin by Sol， 第二次去先知有兩層（因為有日當地同事又帶我同我老細去，我話絕對無問題），我見到佢有火鍋，又有Ｄ應該俾識摸黎嘅遊客嘅Gimmick野，石鍋河粉，我就點返最基本嘅。當地同事話，佢地屬於北越口味，所以少味精較清淡而且配油炸鬼：

呢個係生牛肉河，咁你都見，唔係一大片果隻肥牛，而係生牛𦟌，有牛味，唔夠嫩。不過個湯底真係無得輸，清甜，滿滿嘅蔥，任落嘅青檸汁同辣椒，仲有辣椒醬同醋漬蒜頭，真係太太太好食！你又可以再加料架播，除左我點油炸鬼同埋多一份生牛，我點左煙燻牛舌，湯底又唔同架播！

另外椰水一定要點，平平平平平又多水清甜，左手邊果碟係牛肉粉卷，同樣好好食！

第二次坐樓上，一樣舒服，今次當地同事點左右上角果個，好有趣架播，好似炸飯糰配炒牛肉，個味道又夾架播！呢間真係無得輸，我發現佢係Grab Food都可以點，你地可以試下。

其實，我酒店早餐都有即點即叫牛河：

咁高級酒店，肯定靚嘢，個湯極掂呀！

最後一晚，當地同事介紹我同老細去一間叫SH Garden嘅本地餐廳，上樓嘅，餐廳位置剛好係街角，所以坐近窗邊又好風又好view。我地當晚去到，發現唔少日本人光顧，而餐廳有樂手表演，整體價錢唔貴！

呢度點鮮榨果汁，係可以揀走冰，咁佢收貴你少少。我呢杯西瓜汁，係悶熱天氣之下，非常爽歪歪！

左手邊開始係大樹菠蘿沙律，呢個真係非常驚喜，因為佢將大樹菠蘿肉拆細，撈入魚菘與及其他材料，齋食又或者配上脆片一樣好味！然後係春卷，出色嘅本地餐應，係炸物都無乜油唔肥膩！同樣因為老細要求點左個炸豆腐，香港就喪落蒜椒好惹味，佢地反而係落炸薑蒜，你仲食到豆腐嘅原味。至於側邊嘅烤豬頸肉，佢配上青瓜與蕃茄片解膩。

越南菜點嘅酸湯，同泰國菜嘅濃又搶好唔同，佢地係剛剛好，好似呢個大蝦蔬菜酸湯，好多蔬菜，係飲得舒服開胃；旁邊嘅牛肉炒飯，味淡，但絕不油膩。

我最後同呢個椰青甜品作結：椰青入面放杏仁豆腐同蒟蒻，喂實在太完美喇！

仲有一篇，介紹一間唔係本地人都摸唔到上去嘅靚餐廳。