實事分享

好耐無見，想同大家分享一件柒事，係，好柒。

話說最近好忙，星期五WFH，係屋企一不小心，手機鏡頭方向地跌。攞起，sit，鏡頭爆玻璃。丫唔知典解，影相又無乜事，但又𠝹手，不能不整。於是，約咗今日落Apple整。

天才吧員工見到，問：「先生，有冇保護貼呀？好多時都係爆保護貼架咋」我極之肯定答佢：「無呀」「咁你，有冇Joined Apple Care？」無呀頂，「咁，會好貴。」

「係咪逐個換定係點？」「唔係呀先生，成組鏡頭連住底板，所以要換埋底板，要三千八百幾蚊。」當時心已經講晒粗口，冷靜問：「我想問Apple Gift Card可以用嚟找數架可？」嗯，呢筆，係trade in舊機得來果千八。「可以用，你攞機果陣扣就可以。」

無錯喇，更大打擊係：因為要換底板，所以，要Reset部機！雖然我已經Backup，但我諗起又要逐關打大佬Set過e-banking，心很累。

大局已定，等三粒鐘有機攞。然後呢三粒鐘，食下野，遊下電車河用另一部機捉下Pokemon，期間同咗一兩個朋友講起呢件慘事，唉，好肉痛。

早十五分鐘再到Apple，有位員工叫我名。「我想問，部機reset咗，陣間可以點樣用apple gift card呀？」

「先生你今次唔駛俾錢播！」「吓？」

「係呀，師父check過，其實你有保護貼（！！！），只係爆咗，所以唔駛換嘢。部機都唔駛Reset。」當呢位師兄幫我開機果陣，「噢，之前reset左。」

由於唔駛俾接近四千，雖然，我有兩秒埋怨之前個天才吧妹妹太信我，覺得我堅係爆cam，但因為慳返好多，所以，我已經放下。

隨之而來，同上次換新機一樣，我攪掂所有e-banking乜乜乜，除左，人生銀行。

至於Apple Care，真係好很貴，算吧啦。