由於年底終於乖乖課金用KKBox（當然都繼續買碟），然後執返上年鍾意嘅歌出嚟係快手好多。於是，竟然一月中我就交到功課實在係連我自己都唔敢相信。
咁點解今次分上下半場？因為好似一篇隊廿首歌又好似太多，不如咁啦，順便介紹一下五首未能入圍作品：鄧小巧——兩種語言；岑寧兒／陳蕾——言之無物；黃妍——世界以痛吻我而我歌唱；葉巧琳——難道我還未夠難；與及，我都估唔到但我又實在差少少成首跟住唱嘅，Error——愛情值日生。
第二十位 狠愛狠愛你 王菀之
曲／編：王菀之 詞：陳詠燊 監：王菀之/馮翰銘@theinvisiblemen
其實當日套戲未上畫我已經愛上呢首，畢竟，ivana唱J-Pop rock唔係未試過，但係夠爽夠開心，亦令人想起佢初出道曾經有類似作品。
第十九位 Off/On Collar
曲：T-Ma/Wilma Virintie/Karri Mikkonen 詞：梁栢堅 編：Karri Mikkonen 監：T-Ma
造星睇住佢地出道，出幾首歌其實都幾合我心水，越來越進步，直到呢首我第一次聽就覺得：係喇！又型又有果道勁，MV高水準到不得了（比起Call My Name進步極大），然後就，嗯。吒叱當晚，你有冇同我一樣，一邊睇，一邊眼濕濕？
第十八位 MM7 柳應廷
曲：The Hertz 詞：小克 編：The Hertz/王雙駿 監：王雙駿
比起慘情系列，呢首係最入型入格，佢表現得最得心應手，而佢同The Hertz所產生嘅火花非常精彩，小克份詞就係做自己最MM7，Carl叔叔編曲竟然中段整段Jazz再Progress爆上去，嘩，呢首點會唔喜愛先！
第十七位 Tomorrow AGA
曲：AGA 詞：林若寧 編：Johnny Yim 監：舒文@Zoo Music
唔知典解佢會同環球續約！唔知典解佢會同環球續約！唔知典解佢會同環球續約！講返首歌，佢又開唔到紅館之後照派台，果份自我鼓勵亦鼓勵大家嘅力量，好自然好溫暖，我係一定會再買飛睇佢演唱會，但，快少少離開呢間把鬼唱片公司唔該！
第十六位 Long D 陳凱詠
曲：馮允謙/馮翰銘＠theinvisiblemen 詞：林若寧 編／監：馮翰銘＠theinvisiblemen
疫情下不少類似題材作品，呢首，甜得來又有無奈，無奈之中又有盼望，最重要Jace真係唱得好！放心啦，就快放監，呢間把鬼唱片公司真係走得無錯架！你又唱得又跳得又要型，我地一定等你架！
第十五位 人與人之間 許志安
曲／監：Eric Kwok 詞：林若寧 編 : 張子堅/Eric Kwok
第一次聽感覺未咁強，當細味歌詞，都一把年紀嘅我，有一種說不出嘅感動與震憾！用一首歌將人從出生寫到離世，「最後一個人，平靜出生，平靜出殯」，而許志安無用多餘技巧去唱，若果你忽略咗呢首歌，靜靜感受一下。
第十四位 報復式浪漫 馮允謙
曲：馮允謙 詞：Oscar/馮允謙 編：Nic Tsui/T-ma 監：T-ma/馮允謙
甜，好甜，好典型J Fung R&B，但果種Groovy與及聽住佢唱就知道佢笑住唱，好喜愛，歌詞果種「終於搵到你，唔好浪費時間日夜癡到實啦」實在好鬼得。之後搵Moon Tang合唱果個版，嘩，直頭聽到糖尿病。
第十三位 小心地滑 張天賦
曲／監：徐浩 詞：黃偉文 編：徐浩/黃浩銘
係我上年聽得好多嘅歌，或者推出果陣，突然好想用佢嚟咒果班咩咩。而點解入唔到頭十，我諗，因為份詞有ｄ位可以好ｄ，編曲又可以好ｄ，唱呢，好好架喇！唔知幾時有得唱Ｋ試下爆呢首呢？
第十二位 有今生沒來世 許廷鏗
曲：朱敏希 詞：林夕 編：黃兆銘 監：于逸堯
記得當日新碟試聽會第一次聽，俾林夕嘅詞深深擊中，究竟呢幾年我地如何面對各種無常，又有幾多人因為呢種無常而走唔出去？除左珍惜眼前人以外，我地仲要記住，活在當下。
第十一位 團圓說 謝安琪
曲／詞：謝安琪 編：李智勝 監：李智勝/謝安琪
家人是什麼？團圓又是什麼？無論因為距離而分開，或者因為被迫害而分離，我從這歌感受到的是，年紀漸長，家人朋友至愛，要好好用時間聚聚。多謝Kay，仲有呢個第一次睇已經唔知點解流出眼淚嘅ＭＶ。
沒有留言:
發佈留言